الماتى قالاسى اكىمدىگى مالىمەتىنشە، قالادا الاپات جەر سىلكىنىسى بولعان جاعدايدا 385 مىڭعا جۋىق ادام قازا بولۋى مۇمكىن، بارلىق عيماراتتىڭ 30 پايىزى قيرايدى. بۇل تۋرالى اكىمنىڭ ورىنباسارى سەرىك قۇسايىنوۆ مالىمدەدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
ماجىلىستە وتكەن ۇكىمەت ساعاتىندا دەپۋتات دۇيسەنباي تۇرعانوۆ الماتىداعى جەر سىلكىنىسى قاۋپى تۋرالى ماسەلەنى كوتەردى.
- مامانداردىڭ باعالاۋىنشا، الماتىدا سەيسمولوگتار ۇنەمى ەسكەرتەتىن جويقىن جەر سىلكىنىسى بولعان جاعدايدا ورنى تولماس شىعىن شامامەن 400 مىڭ ادامعا جەتەدى، عيماراتتاردىڭ 60 پايىزىنا دەيىن قيرايدى، ال تىكەلەي شىعىن شامامەن 200 ميلليارد تەڭگە بولادى، - دەدى ماجىلىسمەن.
سەرىك قۇسايىنوۆ دەپۋتات پىكىرىمەن كەلىسىپ، بولجامدى ناقتىلادى.
- ءجيى جەر سىلكىنىسى جاعدايىندا عيماراتتاردىڭ تۇراقتىلىعىن تالداۋدىڭ ەسەپتىك دەرەكتەرىن زەردەلەي كەلە، الماتىدا 7-8 بالدىق كۇشتى ءدۇمپۋ بولسا، بارلىق عيماراتتىڭ شامامەن، 30 پايىزى قيراۋى مۇمكىن. حالىقتىڭ جالپى شىعىنى 370 مىڭنان 385 مىڭ ادامعا دەيىن بولادى، اقشالاي شىعىن 2 تريلليون 479 ميلليارد تەڭگەگە جەتۋى مۇمكىن، - دەدى قۇسايىنوۆ.
توتەنشە جاعدايلار ءمينيسترى يۋري يلين بولجام جاساۋدىڭ ءارتۇرلى ءادىسى بار ەكەنىن اتاپ ءوتتى.
- ەگەر كسرو ادىستەمەسىن الاتىن بولساق، وندا بۇل كورسەتكىشتەر شامامەن بىردەي بولۋى مۇمكىن. وقىعان مامانداردىڭ، سونىڭ ىشىندە الماتىنىڭ، جايىقتىڭ وكىلدەرىنىڭ ادىستەمەسىن الساق، ولار كورسەتكىشتى بىرنەشە ەسە تومەندەتەدى. دەمەك، بۇل داۋلى ماسەلە، - دەدى ول.
دۇيسەنباي تۇرعانوۆ "قازاقستاننىڭ سەيسميكالىق قاۋىپسىزدىگىن قامتاماسىز ەتۋ جونىندەگى 2018-2020 جىلدارعا ارنالعان جۇمىستاردىڭ تيىمدىلىگىن ارتتىرۋ جونىندەگى ءىس-شارالار كەشەنى" جول كارتاسىنا سايكەس 36 تارماقتىڭ 18-ءى عانا ورىندالعانىن ايتتى.
- قارجى تاپشىلىعىنا بايلانىستى سەيسميكالىق توزىمدىلىك باعدارلاماسى تولىق ورىندالمادى، قارجى رەسۋرستارىنىڭ جەتكىلىكسىزدىگىنەن كوپ باعدارلاما قىسقارتىلدى. پاندەميا بىزدەن كوپ قاراجاتتى، سونىڭ ىشىندە توتەنشە جاعدايلاردىڭ الدىن الۋ ماسەلەلەرىنە دە ءبولىندى. اكىمدىكتىڭ ءوزى قارجى ءبولدى. الماتىداعى بارلىق نىساندى پاسپورتتاۋ جۇرگىزىلدى. مالىمەتتەر بازاسى ساۋلەت جانە قۇرىلىس باقىلاۋ باسقارماسىندا ورنالاسقان جانە جوبانى ودان ارى جۇزەگە اسىرۋدا پايدالانىلادى، - دەدى يۋري يلين.
"ادىرنا" ۇلتتىق پورتالى
