قازاقستاندا 3,5 مىڭعا جۋىق ادام دونورلىق ورگانداردى ترانسپلانتاتسيالاۋدى قاجەت ەتەدى. بۇل تۋرالى بۇگىن ۇلتتىق عىلىمي كارديوحيرۋرگيالىق ورتالىعىنىڭ ترانسپلانتاتسيا بويىنشا ۇيلەستىرۋشىسى ساۋلە شايسۇلتانوۆا شىمكەنت جۇرەك ورتالىعىندا وتكەن ءباسپاسوز كونفەرەنتسياسىندا مالىمدەدى.
ساۋلە تالعاتقىزىنىڭ ايتۋىنشا، جۇرەك الماستىرۋدى قاجەت ەتەتىندەردىڭ ىشىندە 150-گە جۋىعى بالالار.
- بۇگىندە بۇكىل الەمدە ترانسپلانتاتسيالىق بەلسەندىلىكتىڭ ءوسۋى جانە دونورلىق پروتسەستى ۇيىمداستىرۋدا ىلگەرىلەۋ بايقالادى. جىل سايىن ورگانداردى الماستىرۋ بويىنشا 115 مىڭنان استام وپەراتسيا جاسالادى، ال زاماناۋي تەحنولوگيالار پاتسيەنتتەردىڭ ءومىرىن كوپتەگەن جىلدارعا ۇزارتۋعا مۇمكىندىك بەرەدى. ءبىزدىڭ ەلىمىزدە قايتىس بولعاننان كەيىنگى دونوردان دونورلىق ورگانداردى ترانسپلانتاتسيالاۋ 2012 جىلدان باستاپ جۇرگىزىلۋدە. وسى كەزەڭدە 84 جۇرەك جانە 14 وكپە ترانسپلانتاتسياسى جاسالدى. دەگەنمەن دونورلىق ماسەلەسى ءبىز ءۇشىن ءالى كۇنگە دەيىن شەشىمىن تاپپاعان كۇردەلى ماسەلە، - دەيدى س. شايسۇلتانوۆا.
ءباسپاسوز كونفەرەنتسياسىندا قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ قالاداعى جۇرەك ورتالىعىنىڭ ترانسپلانتاتسيا جاساۋعا دايىن ەكەندىگىن اتاپ ءوتتى. جوسپار بويىنشا الداعى ءۇش ايدا جۇرەك ورتالىعىنىڭ ماماندارى اعزا الماستىرۋ وتاسىن جاساماق. بۇل ءۇشىن ەمدەۋ مەكەمەسىنىڭ وتا جاساۋ زالى وپەراتسياعا قاجەتتى جوعارى تەحنولوگيالىق قۇرىلعىلارمەن جابدىقتالعان. بۇعان قوسا كارديوحيرۋرگ ماماندارى ارنايى وقىتۋدان ءوتىپ، بىلىكتىلىگىن ارتتىرعان.
