بقو-دا «قازپوشتانىڭ» ەكى قىزمەتكەرى كاسىپكەرلەردىڭ زەينەتاقىسى مەن اقشاسىن ۇپتەپ كەتتى، دەپ حابارلايدى «ادىرنا» ۇلتتىق پورتالى «موي گورود» سايتىنا سىلتەمە جاساپ.
بۇگىندە جالپى مولشەرى 40 ملن تەڭگەنى قولدى قىلعان «قازپوشتانىڭ» ەكى ايەل قىزمەتكەرى ۇستالىپ، ۋاقىتشا ۇستاۋ اباقتىسىنا قاماۋعا الىندى.
بقو بويىنشا ەكونوميكالىق تەرگەۋ دەپارتامەنتى «قازپوشتا» بولىمشەلەرىنىڭ ءبىرىنىڭ ەكى قىزمەتكەرى كومپانيانىڭ شوتىنا ودان ءارى اۋدارۋ ءۇشىن جشس وكىلى بەرگەن اقشانىڭ ءبىر بولىگىن زاڭسىز يەمدەنگەنىن حابارلادى. كەلتىرىلگەن شىعىن كولەمى 33 ميلليون تەڭگەدەن اسقان.
سونداي-اق، ايەلدەر الاياقتىق جولمەن زەينەتكەرلەردىڭ سەنىمىنە قيانات جاساپ، 7 ميلليون تەڭگەدەن استام اقشانى يەمدەنگەن.
«ايەلدەرگە قاتىستى قر قىلمىستىق كودەكسىنىڭ 189-بابى «سەنىپ تاپسىرىلعان بوتەننىڭ مۇلكىن يەمدەنۋ» بويىنشا سوتقا دەيىنگى تەرگەۋ باستالدى. كۇدىكتىلەر بقو-نىڭ ەكى تۇرعىنى، ولار ۇستالىپ، ۋاقىتشا ۇستاۋ اباقتىسىنا قامالدى»- دەپ حابارلادى بقو ەكونوميكالىق تەرگەۋ دەپارتامەنتى.
تەرگەۋ مۇددەسى ءۇشىن باسقا مالىمەتتەر جاريالانبايدى.
بيىلعى جىلدىڭ ناۋرىز ايىندا «قازپوشتا» اق باتىس قازاقستان وبلىستىق فيليالىندا جۇرگىزىلگەن ىشكى اۋديت بارىسىندا كليەنتتەردىڭ ەسەپشوتتارىمەن زاڭسىز ارەكەتتەر جاساۋ فاكتىسى انىقتالدى. ارتىنشا «قازپوشتا» ەسەپشوتتارىنداعى اقشالارىن تاپپاي قالعان كليەنتتەرگە ءوز قاراجاتى ەسەبىنەن 2,2 ميلليون تەڭگەنى وتەپ بەرگەن.
«ادىرنا» ۇلتتىق پورتالى.
