بۇگىن، 3 جەلتوقساندا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ جانە قىرعىز رەسپۋبليكاسىنىڭ مەملەكەتتىك حاتشىسى سۇيۇنبەك كاسمامبەتوۆ قىرعىز حالقىنىڭ كورنەكتى مەملەكەت جانە قوعام قايراتكەرى ءجۇسىپ ابدراحمانوۆتىڭ تۋعانىنا 120 جىل تولۋىنا جانە قىرعىز رەسپۋبليكاسىنىڭ قۇرىلۋىنا قاتىستى ارحيۆ قۇجاتتارى مەن تاريحي فوتوسۋرەتتەردەن ارنايى ۇيىمداستىرىلعان كورمەنى تاماشالادى.
«قازاق-قىرعىز – الاشتان» اتتى حالىقارالىق عىلىمي-پراكتيكالىق كونفەرەنتسيا اياسىندا حالىقارالىق تۇركى اكادەمياسى مەن قازاقستان رەسپۋبليكاسى ورتالىق مەملەكەتتىك ءارحيۆى بىرلەسىپ وتكىزگەن تانىمدىق شاراعا ەكى ەلدىڭ مەملەكەتتىك حاتشىلارىمەن بىرگە، قىرعىز رەسپۋبليكاسى پرەزيدەنتىنىڭ كەڭەسشىسى ارسلان كويچيەۆ، قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا، قىرعىز رەسپۋبليكاسىنىڭ مادەنيەت، اقپارات جانە تۋريزم ءمينيسترى ازامات جامانكۋلوۆ، حالىقارالىق تۇركى اكادەمياسىنىڭ پرەزيدەنتى دارحان قىدىرالى، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەباەۆ، قىرعىز رەسپۋبليكاسى جوگوركۋ كەنەشءىنىڭ دەپۋتاتى كانىبەك يماناليەۆ، قر ۇعا اكادەميگى، قازاقستان تاريحشىلار قاۋىمداستىعىنىڭ توراعاسى مامبەت قويگەلديەۆ، بەلگىلى قىرعىز تاريحشىسى، مەملەكەت جانە قوعام قايراتكەرى زاينيدين كۋرمانوۆ، سونداي-اق ءبىر تۋعان ەكى ەلدىڭ زيالى قاۋىم وكىلدەرى مەن تانىمال عالىمدار قاتىستى.
كورمەگە قازاقستان رەسپۋبليكاسى ورتالىق مەملەكەتتىك ءارحيۆى، قازاقستان رەسپۋبليكاسى پرەزيدەنتى ءارحيۆى جانە كينوفوتو جانە دىبىس جازبالارى ءارحيۆى قورلارىنداعى ماتەريالدار قويىلدى.
ەكسپوزيتسيالار قىرعىز حالقىنىڭ كورنەكتى پەرزەنتى ءجۇسىپ ابدراحمانوۆتىڭ ءومىرى مەن قىزمەتىن، قازاق قايراتكەرلەرىمەن قارىم-قاتىناسىن، ورتا ازياداعى باۋىرلاس ەلدەردىڭ ۇلتتىق ساياساتىن جانە تاعى دا باسقا تاقىرىپتاردى قامتىعان.
