اقتوبە وبلىسىندا ەتنومادەني بىرلەستىكتەر ماراپاتتالدى

553

قازاقستان حالقى اسسامبلەياسى اقتوبە وبلىستىق فيليالى عيماراتىندا ەل تاۋەلسىزدىنىڭ 30 جىلدىعىنا ارنالعان «قازاقستان — دوستىق مەكەنى» اتتى سالتاناتتى شارا ءوتتى.

شاراعا وبلىس اكىمى وڭداسىن ورازالين، ەتنومادەني بىرلەستىكتەردىڭ توراعالارى مەن وكىلدەرى، «بىرلىك» اقساقالدار جانە انالار كەڭەسىنىڭ مۇشەلەرى، «جاڭعىرۋ جولى» وبلىستىق جاستار شتابىنىڭ جانە «قوعامدىق كەلىسىم» مەكەمەسىنىڭ ماماندارى قاتىستى.

كەش قازاقستان حالقى اسسامبلەياسىنىڭ «بەيبىتشىلىك پەن كەلىسىمنىڭ 30 جىلى» حالىقتىق تەلەەكسپەديتسياسى» جوباسى اياسىندا تۇسىرىلگەن ەل تاۋەلسىزدىگىنىڭ 30 جىلدىعىنا ارنالعان «بەيبىتشىلىك پەن كەلىسىمنىڭ 30 جىلى» اتتى ءفيلمنىڭ تۇساۋكەسەرىمەن باستالدى.

بۇدان كەيىن شارادا وبلىس اكىمى وڭداسىن ورازالين جينالعانداردى تاۋەلسىزدىكتىڭ 30 جىلدىق مەرەيتويىمەن قۇتتىقتادى.

بيىل قازاقستاننىڭ دەربەس ەل بولعانىنا وتىز جىل تولىپ وتىر. قازاقشا ايتقاندا، ەلىمىز وردا بۇزار جاسقا كەلدى. وسىناۋ وتىز جىل ىشىندە ەگەمەندى ەلىمىز دامىپ، بۇگىندە بەيبىتشىلىك ەلشىسى رەتىندە دۇنيە جۇزىنە تانىلدى. تاۋەلسىزدىك قازاقستاننىڭ ىرگەتاسىن قالاپ، قابىرعاسىن قالىپتاستىرۋ، شاڭىراعىن كوتەرۋ تۇڭعىش پرەزيدەنتىمىز نۇرسۇلتان نازارباەۆتىڭ ەرەن ەڭبەگى دەسەك، سول شاڭىراقتىڭ شايقالماي، بوساعاسى بەرىك، كەرەگەسى كەڭ بولۋىنا وزدەرىڭىزدىڭ قوسقان ۇلەستەرىڭىز زور. ويتكەنى قازاق ەلى بۇگىندە ءبىر شاڭىراقتىڭ استىنداعى ءتۇرلى ەتنوس وكىلدەرىنىڭ دوستىعى مەن ءوزارا ىنتىماقتاستىعىنىڭ الەم مويىنداعان تەڭدەسى جوق سيمۆولىنا اينالدى. ءتىپتى، بۇگىنگى كۇنى ەلىمىزدە ەتنوسارالىق كەلىسىمنىڭ، كونفەسسياارالىق بىرلىكتىڭ بەرىك نەگىزى قالاندى دەپ ايتساق تا ارتىق بولمايدى. قازىرگى تاڭدا اقتوبە وبلىسىندا 90-نان استام وزگە ۇلت وكىلى بەيبىتشىلىك پەن كەلىسىمدە ءومىر ءسۇرىپ جاتىر. وبلىستىق اسسامبلەيا جۇمىسى ەتنوسارالىق جانە كونفەسسياارالىق ديالوگ، قوعامدىق كەلىسىم مەن حالىق بىرلىگىنە نەگىز بولۋدا. ال مۇنىڭ بارىنە اتسالىسىپ جۇرگەن وزىڭىزسىزدەر. مىنە، بۇگىن وسىناۋ ايتۋلى مەرەيتويدىڭ قارساڭىندا سىزدەرمەن بىرگە «بەيبىتشىلىك پەن كەلىسىمنىڭ 30 جىلى» تەلەەكسپەديتسياسى» جوباسىنا كۋا بولىپ وتىرمىز. سوندىقتان بۇگىنگى كەشتە بارشاڭىزدى ەل تاۋەلسىزدىگىنىڭ 30 جىلدىعىمەن قۇتتىقتاي وتىرىپ، بارشاڭىزعا باقىت پەن بەرەكە، ىنتىماق پەن تاتۋلىق تىلەيمىن. تاۋەلسىزدىگىمىزدىڭ تۇعىرى بيىك، ەلىمىز امان، جۇرتىمىز تىنىش بولسىن! — دەدى و.ورازالين.

قۇتتىقتاۋ سوزىنەن كەيىن وبلىس اكىمى جىل قورىتىندىسى بويىنشا بىرلىك پەن بەيبىتشىلىكتىڭ، تولەرانتتىلىق پەن كەلىسىمنىڭ نىعايۋىنا قوسقان ۇلەسى ءۇشىن وبلىستاعى ەتنومادەني بىرلەستىكتەردى العىس حاتتارمەن ماراپاتتاپ، سىي-قۇرمەت كورسەتتى.

شارادا اقتوبە قالاسىندا تۇراتىن ينتەرناتسيونال وتباسىلار مەن تاۋەلسىزدىك قۇرداستارى ءوز قۇتتىقتاۋلارىن جولداپ، ەتنوبىرلەستىك وكىلدەرى كونتسەرتتىك باعدارلاما ۇسىندى. 

«ادىرنا» ۇلتتىق پورتالى.

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket