ەكپە انانىڭ قۇرساعىنداعى بالاعا وڭ اسەر ەتەدى. سەبەبى، ۆاكتسينا العان سوڭ اناسىنان بولاشاق سابيىنە انتيدەنە بەرىلەدى. ەلورداداعى №7 قالالىق ەمحانانىڭ اكۋشەر-گينەكولوگى گۇلناز يسلياموۆانىڭ ايتۋىنشا، ايەل ۆاكتسينانى جۇكتىلىكتىڭ ءۇشىنشى تريمەسترىندە سالدىرعان بولسا، ونىڭ انتيدەنەلەرى بالانى كەم دەگەندە جارتى جىل قورعايدى، دەپ حابارلايدى قازاقپارات.
– جۇكتى ايەلدەردى ۆاكتسينالاۋ قالاي جۇزەگە اسىپ جاتىر؟
– قازىرگى تاڭدا جۇكتى جانە ەمىزۋلى ايەلدەردى ۆاكتسيناتسيالاۋ وڭايعا سوعىپ جاتقان جوق. ويتكەنى الەۋمەتتىك جەلىلەردە تاراعان كوپتەگەن جالعان اقپاراتتار، ۆيدەو-سلايدتار ۆاكتسينا ەگۋگە كەرى اسەرىن تيگىزۋدە.
كوپتەگەن ايەلدەر سول جالعان اقپاراتارعا سەنىپ، ۆاكتسينا الۋعا قارسىلىق بىلدىرەدى. قازىر اقپاراتتىق تەحنولوگيانىڭ دامىعان زامانىندا ۆاكتسينانىڭ اعزاعا، جاتىرداعى سابيگە وڭ اسەرى تۋرالى اقپاراتتانعان ايەلدەر كەزدەسەدى. سوعان قاراماي، ءار جۇكتى ايەلمەن ۆاكتسينانىڭ پايداسى تۋرالى اڭگىمە جۇرگىزەمىز.
– ۆاكتسينا جۇكتى ايەلدىڭ قۇرساعىنداعى سابيگە قالاي اسەر ەتەدى؟
– بۇگىنگە دەيىن ءبىزدىڭ ەمحانادا 96 ايەل ۆاكتسينا الدى، ونىڭ 18-ءى جۇكتى، 78-ءى – ەمىزۋلى ايەلدەر. ەكپە انانىڭ قۇرساعىنداعى بالاعا وڭ اسەر ەتەدى. سەبەبى، ەكپە العان سوڭ اناسىنان بولاشاق سابيىنە انتيدەنەلەر بەرىلەدى.
ايەل ۆاكتسينانى جۇكتىلىكتىڭ ءۇشىنشى تريمەسترىندە سالدىرعان بولسا، ونىڭ انتيدەنەلەرى بالانى كەم دەگەندە جارتى جىل قورعايدى.
ايتا كەتەيىك، قازىر الەم بويىنشا جۇكتى ايەلدەردى ەگۋ باستالدى. ەكپە اتاۋى – «كوميرناتي» - SARS-CoV-2 تۋدىراتىن كوروناۆيرۋستىق ينفەكتسيانىڭ پروفيلاكتيكاسىنا ارنالعان مرنق (نۋكلەوزيدتەرمەن موديفيكاتسيالانعان) نەگىزىندەگى كۆي-گە قارسى ۆاكتسينا.
«كوميرناتي» (Pfizer كومپانياسىنىڭ ءونىمى) قۇرامىندا يممۋندىق قورعانىش تۋدىراتىن ۆيرۋس جوق، كۆي ينفەكتسياسىن تۋدىرۋى مۇمكىن ەمەس. ءبىر قۇتىدا سۇيىلتقاننان كەيىن 0,3 مل-دەن 6 دوزا بار.
- جۇكتى ايەلدەرگە قانداي جاعدايدا ۆاكتسينا الۋعا بولمايدى؟
- بەلسەندى زاتقا نەمەسە پرەپاراتتىڭ كەز-كەلگەن باسقا كومپونەنتتەرىنە اللەرگيا بولسا;
- جۇكتىلىكتىڭ العاشقى 16 اپتاسىندا;
- جۇكتىلىك مەرزىمى 37 اپتا جانە ودان جوعارى بولسا;
- ءجىتى ينفەكتسيالىق اۋرۋلار كەزىندە;
- يممۋندى تاپشىلىقتى اۋرۋلار;
- انتيكواگۋليانت تەراپيا قابىلداپ جۇرگەن ايەلدەرگە، قان ۇيۋ جىلدامدىعى بۇزىلعان ايەلدەرگە (گەموفيليا) ەكپە الۋعا بولمايدى.
– كوروناۆيرۋس جۇكتى ايەلدەردە قالاي جۇرەدى جانە قانشالىقتى قاۋىپتى؟
جۇكتى ايەلدەردە كوروناۆيرۋس بەلگىلەرى سيمپتومسىز جۇرەدى. بارىندە بولماسا دا، كوبى ءوزىنىڭ اۋىرىپ جۇرگەنىن بايقامايدى. ال COVID-19 اسقىنعاندا اياعى اۋىر ايەلدەردى ەمدەۋ وڭايعا سوقپايدى.
سوندىقتان جۇكتى ايەلدەر COVID-19 ۆيرۋسىن جۇقتىرۋ بويىنشا قاۋىپتى توپقا جاتادى. اسىرەسە ەكستراگەنيتالدى اۋرۋى بار، ياعني قانت ديابەتى، برونحيالدى استما، سوزىلمالى قابىنۋ اۋرۋلارى بار جانە 35 جاستان اسقان جۇكتى ايەلدەر ءۇشىن قاۋىپتى.
جۇكتىلىك كەزىندە جاتىردىڭ وسۋىنە بايلانىستى وكپەگە ورىن از قالادى جانە ايەل اعزاسىندا اينالىمداعى قان كولەمى جوعارىلايدى.
ىشتەگى ۇرىقتى وتتەگىمەن قامتاماسىز ەتۋ ءۇشىن انانىڭ جۇرەگى مەن قانتامىرلارعا 2 ەسە كۇش تۇسەدى. ۆيرۋس جۇققان ساتتە، وسى اتالعان اعزالارعا اسەرىن تيگىزەدى، جۇكتىلىك اعىمىنىڭ اسقىنۋىنا اكەلۋى مۇمكىن.
سوندىقتان، قازىرگى ۋاقىتتا انا مەن بالا دەنساۋلىعىن ساقتاۋدىڭ ەڭ ءتيىمدى جولى – ۆاكتسينا الۋ.
“ادىرنا” ۇلتتىق پورتالى
