اقتوبەدە ءىز-ءتۇزسىز كەتكەن گەولوگتار تابىلدى دەپ حابارلايدى "ادىرنا" ۇلتتىق پورتالى.
اقتوبە وبلىستىق تجد ءباسپاسوز قىزمەتى حابارلاعانداي، قازىر ولاردىڭ جاعدايى جاقسى. ءىز-ءتۇزسىز كەتكەن گەولوگتار كەشە ساعات 14.50-دە بايلانىسقا شىققان. ولار قىستاقتان تابىلدى.
"جوعالعان گەولوگتار قيسىقساي قىستاعىنان امان-ەسەن تابىلدى. جاعدايلارى جاقسى، مەديتسينالىق كومەك قاجەت بولمادى. قازىرگى ۋاقىتتا تابىلعان 4 گەولوگ ايتەكە بي اۋدانىنىڭ قارابۇتاق اۋىلىنا جەتكىزىلدى",-دەپ حابارلادى وبلىستىق تجد ءباسپاسوز قىزمەتى.
ايتا كەتەيىك، 26 قاراشادان باستاپ گەولوگتارعا ىزدەۋ جاريالاندى. ولار 25 قاراشا كۇنى سوڭعى رەت بايلانىسقا شىعىپ، كەيىن حابار-وشارسىز قالعان. قۇرامىندا 33 ادام جانە 8 بىرلىك تەحنيكادان تۇراتىن 5 ىزدەۋ توبى جۇمىلدىرىلدى. سونداي-اق اۆيا ىزدەۋ ءۇشىن تجم "قازاۆياقۇتقارۋ" اق-نىڭ ەۆروكوپتەرى ۇشىپ، اقتوبە-قۇمساي-قايراقتى-قايىڭدى-ميلىساي-ارالتوعاي ماڭىن شولىپ وتكەن بولاتىن.
"ادىرنا" ۇلتتىق پورتالى.
