"زامان-اي" ءانى جاپون كاراوكەسىندە ايتىلاتىن اندەر تىزىمىنە ەنگەن دەپ حابارلايدى "ادىرنا" ۇلتتىق پورتالى.
بۇل تۋرالى ءوزىنىڭ فەيسبۋك پاراقشاسىندا قازاقستان جازۋشىلار وداعىنىڭ توراعاسى، بەلگىلى اقىن ۇلىقبەك ەسداۋلەت جازدى.
"جاپونيادا قازاق، اعىلشىن، جاپون تىلدەرىندە جارىق كورگەن "زامان-اي" ءانىنىڭ ديسكىسى. ورىنداۋشى توكيولىق ءانشى توماكو. قازاقشاسى ءبىزدىڭ روزا رىمباەۆانىڭ ورىنداۋىندا بەرىلگەن. جاپون كاراوكەسىندە ايتىلاتىن اندەر تىزىمىنە ەنىپتى. كومپوزيتور دوسىم تولەگەن مۇحامەدجانوۆتىڭ مۋزىكاسىنا جازعان ولەڭىمىز بۇل كۇندە الەمدىك انتيادرولىق قوزعالىس گيمنىنە اينالدى", — دەپ جازدى اقىن.
ايتا كەتۋ كەرەك، ءانشى روزا رىمباەۆا ورىندايتىن "زامان-اي" ءانى شىققاننان كەيىن كوپ ۇزاماي جاپونيانىڭ قازاقستانداعى ەلشىلىگى ءاننىڭ اۆتورى ۇلىقبەك ەسداۋلەتكە حابارلاسقان. "قازاق پەن جاپوننىڭ قاسىرەتى ءبىر. ەكى ۇلت تا يادرولىق سىناقتان قاسىرەت كوردى. رۇقسات ەتسەڭىز، ءسىزدىڭ جانە كومپوزيتور تولەگەن مۇحامەدجانوۆتىڭ اۆتورلىق قۇقىن ساقتاي وتىرىپ، جاپون تىلىنە اۋدارىپ، ءاندى ورىنداعىمىز كەلەدى", – دەپ كەلىسىم بەرۋىن سۇراعان. اقىن مەن سازگەردەن رۇقسات الىنعاننان كەيىن ءان جاپون تىلىنە اۋدارىلىپ، توماكو ەسىمدى تانىمال ءانشىسى ساحنا تورىنە الىپ شىققاندا، جاپوندار ءاننىڭ اسەرىنەن سەلتيىپ تۇرىپ قالعان.
"ادىرنا" ۇلتتىق پورتالى.
