جاستارعا ونەگە

2705
Adyrna.kz Telegram

قازاقستان رەسپۋبليكاسى ۇلتتىق مۋزەيىندە ەلىمىزدىڭ مادەني مۇراسىن، سونداي-اق، مۋزەيدە ورنالاسقان قۇندى جادىگەرلەردى ناسيحاتتاپ، جاستاردىڭ ءبىلىمىن شىڭداۋدى، ستۋدەنتتەردىڭ شىعارماشىلىق قابىلەتتەرىن انىقتاپ، ءوزارا ءبىر-بىرىنە تانىتۋعا ىقپال جاساۋدى ماقسات تۇتقان «دانا» ستۋدەنتتەر كلۋبى وسىدان ءبىر جىل بۇرىن قۇرىلعان ەدى. وسى ۋاقىت ارالىعىندا «دانا» مۋزەيلىك ءبىلىم بەرۋ جوباسى اياسىندا بىرقاتار ءىس شارالار وتكىزىلىپ، ولارعا ەلوردانىڭ جوعارى وقۋ ورىندارىنىڭ ستۋدەنتتەرى قاتىسىپ كەلەدى.

«دانا» ستۋدەنتتەر كلۋبى ءومىرى مەن ەڭبەك جولى ۇلگى تۇتارلىق تۇلعالار مەن جاس ۇرپاقتىڭ اراسىن جالعاۋشى التىن كوپىر سەكىلدى. ۇلكەن ومىرگە ەندى عانا اياق باسىپ كەلە جاتقان ستۋدەنتتەر مەن وقۋشىلار وزدەرى كەزدەسكەن تۇلعالاردان وسيەت تىڭداپ، الداعى ومىرىنە سايكەس ناسيحات الادى. سونداي، كەزدەسۋلەردىڭ ءبىرى – بەلگىلى ارحيتەكتور، سۋرەتشى، تالانت يەسى ساكەن نارىنوۆپەن كەزدەسۋ كەشى بولدى.

الەمنىڭ ەڭ اتاقتى 20 ءمۇسىنشىسى تىزىمىنە ەنگەن شەبەردىڭ «قازاق حالقىنىڭ ەتنيكالىق باعىتتارى» تاقىرىبىندا جان-جاقتى وربىگەن زەردەلى اڭگىمەسى مەن ويلى پىكىرلەرى جۇرەككە جەتىپ جاتتى. كەزدەسۋ بارىسى ءمۇسىنشىنىڭ مۋزەي ەكسپوزيتسياسىندا ورنالاسقان «ۋاقىت پەن كەڭىستىكتە» كورمەسىن تاماشالاۋمەن جالعاستى. اتالمىش ستۋدەنتتەر كلۋبىندا ۇلكەن بۋىندى اعالارمەن قاتار شىعارماشىل جاستارمەن دە كەزدەسۋلەر ۇيىمداستىرىلىپ تۇرادى. سول جالىندى جاستاردىڭ ءبىرى، تالانت يەسى، جاس ءانشى، كومپوزيتور اسقار اشىممەن كەزدەسۋ وتكىزىلدى.

اسقار ءوز شىعارماشىلىعى جايلى اڭگىمە قوزعاپ، انا تىلىندە، سونداي اق وزگە  دە تىلدەردەگى اندەرىن جوعارى شەبەرلىكپەن ورىنداپ، كەزدەسۋگە قاتىسقان جاستاردىڭ العىسىنا بولەندى. جاندى داۋىستا ورىنداعان اندەرى گيتارا جانە كاحون اسپاپتارىمەن سۇيەمەلدەندى.

تىڭدارمان ستۋدەنتتەر قاۋىمى  جان-جاقتى سۇراقتار قويىپ، بىرىگىپ ءان شىرقاپ، كەزدەسۋدىڭ ودان ءارى قىزىقتى بولىپ جالعاسۋىنا اتسالىستى.

جينالعان جاستار قاۋىمى ەرەكشە كەزدەسۋدەن ادەمى كۇي كەشتى.


nationalmuseum.kz

پىكىرلەر