قاسىم-جومارت توقاەۆ بريۋسسەلگە رەسمي ساپارى اياسىندا بەلگيانىڭ پرەمەر-ءمينيسترى الەكساندر دە كروومەن كەلىسسوز جۇرگىزدى، دەپ حابارلايدى اقوردانىڭ ءباسپاسوز قىزمەتى.
كەزدەسۋ بارىسىندا تاراپتار ساياسي، ساۋدا-ەكونوميكالىق، ينۆەستيتسيالىق جانە گۋمانيتارلىق سالالار بويىنشا قازاقستان مەن بەلگيا اراسىنداعى قارىم-قاتىناستاردىڭ دامۋ پەرسپەكتيۆالارىن جان-جاقتى قاراستىردى. سونداي-اق ولار حالىقارالىق جانە ايماقتىق كۇن تارتىبىندەگى وزەكتى ماسەلەلەر جونىندە پىكىر الماسىپ، حالىقارالىق ۇيىمدار اياسىنداعى ءوزارا ءىس-قيمىلداردى تالقىلادى.
قاسىم-جومارت توقاەۆ پرەزيدەنت بولىپ سايلانعالى بەلگياعا العاش رەت رەسمي ساپارمەن كەلىپ وتىرعانىن ايتتى.
مەملەكەت باسشىسى قازاقستاننىڭ بەلگيانى ەۋروپالىق وداقتاعى ساياسي جانە ەكونوميكالىق تۇرعىدان ماڭىزدى سەرىكتەس سانايتىنىن جەتكىزدى.
كەزدەسۋ بارىسىندا تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋعا ەرەكشە نازار اۋداردى. مەملەكەت باسشىسىنىڭ ايتۋىنشا، بەلگيا – ەلىمىزدىڭ ەكونوميكاسىنا ينۆەستيتسيا سالۋ جونىنەن التىنشى ورىنداعى مەملەكەت. 2005 جىلدان بەرى بەلگيا ينۆەستيتسياسىنىڭ جالپى مولشەرى 9,3 ميلليارد اقش دوللارىنا جەتتى. پاندەمياعا قاراماستان، ءوزارا ساۋدا كولەمى 13 پايىزعا ءوسىپ، 300 ميلليون دوللاردان استى. قازاقستاندا بەلگيالىق كاپيتالدىڭ قاتىسۋىمەن 65 زاڭدى تۇلعا، فيليالدار مەن وكىلدىكتەر جۇمىس ىستەيدى.
ەكونوميكالىق بايلانىستاردى جانداندىرۋ ماقساتىمەن ساۋدا-ەكونوميكالىق ىنتىماقتاستىق جونىندە ۇكىمەتارالىق كوميسسيا قۇرۋ تۋرالى ۋاعدالاستىققا قول جەتكىزىلدى.
سونىمەن قاتار تاراپتار كوروناۆيرۋس پاندەمياسىنا قارسى كۇرەس بويىنشا ىقپالداستىق ورناتۋ ماسەلەسىن قاراستىردى. مەملەكەت باسشىسى بەلگيانىڭ پرەمەر-مينيسترىنە قازاقستاندىق QazVac ۆاكتسيناسىنىڭ جاسالعانى تۋرالى ايتتى. قاسىم-جومارت توقاەۆ بەلگيالىق بيوفارماتسەۆتيكا سالاسىنىڭ دامۋ دەڭگەيىن جوعارى باعالاپ، QazBioPharm ۇلتتىق حولدينگى مەن جاقىندا قۇرىلعان بەلگيالىق بيوفارماتسەۆتيكالىق پلاتفورما اراسىندا ىنتىماقتاستىق ورناتۋدى ۇسىندى.
اڭگىمەلەسۋ بارىسىندا تاراپتار گلازگوداعى سور26 ءسامميتىنىڭ قورىتىندىلارى بويىنشا كليماتتىڭ وزگەرۋىنە قاتىستى ماسەلەلەردى تالقىلاپ، كومىرتەگى بەيتاراپتىعىنا قول جەتكىزۋ ءۇشىن ۇلتتىق دەڭگەيدە قابىلدانىپ جاتقان شارالارعا توقتالدى.
كەزدەسۋدە قاۋىپسىزدىكتى قامتاماسىز ەتۋ، تەرروريزمگە، ادام ساۋداسى مەن زاڭسىز ميگراتسياعا قارسى كۇرەس ماسەلەلەرى دە ءسوز بولدى. قاسىم-جومارت توقاەۆ قازاقستاننىڭ اۋعانستانعا گۋمانيتارلىق كومەك كورسەتۋ ءۇشىن قابىلداپ جاتقان شارالارى تۋرالى ايتىپ بەردى.
مەملەكەت باسشىسى ەۋرووداقپەن ايماقتىق دەڭگەيدەگى بايلانىستار جونىندە ايتا كەلىپ، «قازاقستان – ەۋرووداق» جانە «ورتالىق ازيا – ەۋرووداق» فورماتتارى بويىنشا بەلگيامەن تىعىز ىنتىماقتاستىق ورناتۋعا دايىن ەكەنىن ناقتىلادى. وسى رەتتە قازاقستان مەن ەۋرووداق اراسىنداعى كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمنىڭ، سونداي-اق ەۋرووداقتىڭ ورتالىق ازيا جونىندەگى جاڭا ستراتەگياسىنىڭ بارلىق الەۋەتىن ءتيىمدى پايدالانۋدىڭ ماڭىزدىلىعىنا ءمان بەرىلدى.
قاسىم-جومارت توقاەۆ الەكساندر دە كرووعا قازاقستاندا جۇزەگە اسىرىلىپ جاتقان اۋقىمدى ساياسي جانە ەكونوميكالىق رەفورمالار تۋرالى مالىمەت بەردى. بەلگيا پرەمەر-ءمينيسترى قازاقستاننىڭ ەۋرووداقپەن ىنتىماقتاستىعىن جوعارى باعالادى.
كەزدەسۋ سوڭىندا مەملەكەت باسشىسى بەلگيا پرەمەر-ءمينيسترىن قازاقستانعا رەسمي ساپارمەن كەلۋگە شاقىردى. الەكساندر دە كروو ەلىمىزگە كەلۋگە قىزىعۋشىلىق ءبىلدىردى.
“ادىرنا” ۇلتتىق پورتالى
