الماتى وبلىسىنداعى قاسكەلەڭ پەرزەنتحاناسىنداعى دارىگەرلەر تەرەزەدەن سەكىرمەك بولعان جۇكتى ايەلدى قۇتقارىپ قالعان، دەپ حابارلايدى "ادىرنا" ۇلتتىق پورتالى ulysmedia.kz سايتىنا سىلتەمە جاساپ.
الماتىدا توعىزىنشى قاباتتان بالالارىن لاقتىرىپ، ارتىنان ءوزى سەكىرىپ كەتكەن ايەلدىڭ وقيعاسى قوعامدى ءدۇر سىلكىندىردى. بىرنەشە كۇن بۇرىن ءدال وسى ءۇيدىڭ كورشى پودەزىندە تاعى ءبىر ايەل وزىنە قول جۇمساپ، تەرەزەدەن سەكىرىپ كەتكەن. راستالعان اقپاراتقا سۇيەنسەك، ونىڭ پسيحيكالىق اۋىتقۋشىلىعى بولعان ءارى وزىنە بىرنەشە رەت قول جۇمساعىسى كەلگەن. كورشىلەردىڭ ايتۋىنشا، كەلىنشەكتىڭ جاسى وتىزعا تاياپ قالعان، باسىنداعى نەسيەسىن تولەي الماي جۇرگەن.
ال وسى كەزدە قاراساي اۋدانى قاسكەلەڭ پەرزەنتحاناسىندا جاتقان ايەل ءۇشىنشى قاباتتىڭ تەرەزەسىنەن سەكىرمەكشى بولعان. دارىگەرلەر دەر كەزىندە ۇلگەرىپ، ايەلدى امان الىپ قالدى. مۇنداي شاراسىزدىققا نە سەبەپ بولعانىن قازىر دقۇقىق قورعاۋ ورگاندارى تەكسەرىپ جاتىر.
قالالىق كلينيكالىق اۋرۋحانانىڭ تەراپەۆتى جاس ايەلدەردىڭ ءوز-وزىنە قول جۇمساۋىنىڭ سەبەبى كۇيەۋىمەن نەمەسە تۋىستارىمەن كۇندەلىكتى تۇرمىستىق كيكىلجىڭدەرمەن بايلانىستى بولۋى مۇمكىن دەيدى.
«بۇل ايەلدىڭ ءۇش بالاسى بولدى. بالالار اراسىنداعى جاس ايىرماشىلىق وتە جاقىن. ال ءوزى نەبارى 28 جاستا. بىلەسىز بە، ءتىپتى ءبىزدىڭ مەدبيكەلەردىڭ ءوزى بوسانا سالا، جۇمىسقا شىعىپ كەتەدى. «نەگە؟» دەپ سۇراسام، ولار «ءبىز جۇمىس ىستەۋىمىز كەرەك» دەيدى. ال تۋىستارى قۋىپ جىبەرەتىن كەزدەر دە بولعان. اقشا كەرەك. وسىعان قاراماستان ولار ءجيى بوسانادى. نەگە دەسەڭىز، وعان جاردەماقى الادى. بىرىنە توڭازىتقىش السا، ەكىنشىسىنە شاڭسورعىش. ازاپ شەگىپ جاتقان پسيحيكانى، بوسانۋدان كەيىنگى اعزانى قالپىنا كەلتىرۋ كەرەك ەكەندىگىن ويلامايدى. بۇل ايەل دە ۇزاق ۋاقىت دەپرەسسياعا ۇشىراپ، بولماشى ۇرىس اسەر ەتىپ وتىر»، – دەيدى دارىگەر.
"ادىرنا" ۇلتتىق پورتالى
