تۇركىستان وبلىسى مەن شىمكەنت قالاسىنىڭ تۋريزم باسقارمالارىنىڭ باسشىلارى وڭىرلىك كوممۋنيكاتسيالار قىزمەتىنىڭ الاڭىندا ءوزارا مەموراندۋمعا قول قويىپ، ەكى جاقتى كەلىسىمگە كەلدى، دەپ حابارلايدى قازاقپارات ءوڭىر باسشىسىنىڭ ءباسپاسوز قىزمەتىنە سىلتەمە جاساپ.
مۇنداعى ماقسات - تۇركىستان وبلىسى مەن شىمكەنت قالاسىن ءبىرتۇتاس تۋريستىك باعىت رەتىندە ودان ءارى دامىتۋ. قول قويۋ راسىمىندە وبلىستىق تۋريزم باسقارماسىنىڭ باسشىسى گۋلميرا احبەرديەۆا ەكى ايماقتىڭ ەرەكشەلىكتەرى مەن تۋريستىك الەۋەتىن پايدالانا وتىرىپ، بولاشاقتا ءتۇرلى باعىتتاعى تۋريستەردى تارتۋدىڭ ءىرى ورتالىقتارىنىڭ بىرىنە اينالاتىنىنا سەنىم ءبىلدىردى. «وڭىرلەردە ءتۋريزمنىڭ تاريحي-مادەني، ەكولوگيالىق، ەكسترەمالدى، گاسترونوميالىق جانە باسقا دا تۇرلەرىن دامىتۋعا زور مۇمكىندىك بار. قاراپايىم مىسالى، ق.ا.ياساۋي كەسەنەسىنە ءمىناجات ەتۋ تۋرى شىمكەنت قالاسىنىڭ اۋماعىندا ورنالاسقان اتاقتى سوپىنىڭ اتا-اناسى - يبراگيم اتا مەن قاراشاش انا كەسەنەلەرىنە بارۋدان باستالادى. ياعني، تۇركىستان مەن شىمكەنتتى قاي جاعىنان الىپ قاراساڭىز دا ءبولىپ قاراۋعا كەلمەيتىن ورتاق دۇنيەلەرگە باي. وسى رەتتە بۇگىنگى ەكى جاقتى مەموراندۋم الداعى ۋاقىتتا ءوزىنىڭ جەمىسىن بەرىپ، ءساتتى جوبالاردى جۇزەگە اسىرۋعا سەپ بولادى دەگەن سەنىم بار»، – دەدى گ. احبەرديەۆا.
