تۇركىستان وبلىسىنداعى مەكتەپتەردىڭ 100 پايىزى «اشىق» قوسىمشاسىمەن جۇمىس ىستەيدى. وسىلاي دەگەن وبلىس اكىمىنىڭ ورىنباسارى ساكەن قالقامانوۆ ءبىلىم ۇيالارى 1 قىركۇيەكتەن باستاپ ءداستۇرلى فورماتقا، ياعني وفلاين دارىسكە كوشەتىنى تۋرالى ايتتى.
الايدا، كۇنگەي وڭىردەگى ينتەرنەتتىڭ السىزدىگى اشىق جۇيەسىنە كەدەرگى كەلتىرۋى مۇمكىن ەكەنىن جاسىرمادى. ال، مۇنداي جاعدايدا مەكتەپكە ۆاكتسينا پاسپورتىن كورسەتۋ ارقىلى كىرۋگە بولادى دەيدى.
ساكەن قالقامانوۆ، تۇركىستان وبلىسى اكىمىنىڭ ورىنباسارى: «بىزدە 56 پايىز تۇركىستان وبلىسىندا ينتەرنەتپەن قامتاماسىز ەتىلمەگەن، ءالسىز. ونداي جەرلەردە ءداستۇرلى تۇردە ۆاكتسيناتسياسىمەن پاسپورتتى قاراپ سانيتارلىق نورماعا سايكەس كىرگىزە بەرەمىز بالالاردى. نەگىزى بىلتتىر دا ءبىز 180 مەكتەپتى ءداستۇرلى تۇردە وقىتقانبىز. سول كۇيىندە سولاي وقىتا بەرەمىز».
قازىرگى تاڭدا وبلىس بويىنشا 78 مەكتەپتىڭ قۇرىلىسى جۇرگىزىلىپ جاتىر. ءارى بيىل وڭىردەگى 2 اپاتتى جانە ءبىر ءۇش اۋىسىمدى ءبىلىم ۇيالارىنىڭ ماسەلەسى شەشىمىن تابادى. قالعان 7 اپاتتى جانە ءۇش اۋىسىمدى مەكتەپ قۇرىلىسى 2023 جىلعا جوسپارلانىپ وتىر دەيدى سالا جاۋاپتىلارى. سونداي-اق بيىل بىرىڭعاي مەكتەپ فورماسى قاجەت ەمەس ەكەندىگىن اتاپ وتكەن وبلىس اكىمىنىڭ ورىنباسارى وقۋشىنىڭ كيىمى كلاسسيكالىق ۇلگىدە بولۋى شارت ەكەنىن ەسكەرتتى.
ساكەن قالقامانوۆ، تۇركىستان وبلىسى اكىمىنىڭ ورىنباسارى: «بالالار كلاسسيكالىق تۇردە مەكتەپكە بارۋى كەرەك. ول دەگەنىمىز نە؟ شالبار، دجينسى ەمەس. سپورتتىق شالبارلار ەمەس. كلاسسيكالىق قارا نەمەسە كوك شالبار جانە اق كويلەك. ۇستىنە كوستيۋم كيۋى مىندەتتى ەمەس. بىراق، قارا نەمەسە كوك رۋباشكا نەمەسە سۆيتەر سياقتى كيىم كيىپ كەلۋ كەرەك. مىناۋ قىزداردىڭ كورىنىسى. استىندا يۋبكا نەمەسە شالبار. اق كويلەك، بلۋزكا كوفتا. ەشقانداي ورامال، ەشقانداي حيدجاب دەگەن بولمايدى. ول كلاسسيكالىق فورما ەمەس».
ايتا كەتەيىك، بالالار قاۋىپسىزدىگىن كۇشەيتۋ ماقساتىندا وبلىستاعى 400 مەكتەپكە تولىعىمەن بەينەباقىلاۋ ورناتىلىپتى. ەندى ءبىلىم ۇيالارىنداعى قاۋىپسىزدىك تىكەلەي ءتارتىپ ساقشىلارىنىڭ باقىلاۋىندا بولادى.
