Túrkistan oblysyndaǵy mektepterdiń 100 paıyzy «Ashyq» qosymshasymen jumys isteıdi. Osylaı degen oblys ákiminiń orynbasary Sáken Qalqamanov bilim uıalary 1 qyrkúıekten bastap dástúrli formatqa, ıaǵnı oflaın dáriske kóshetini týraly aıtty.
Alaıda, kúngeı óńirdegi ınternettiń álsizdigi ashyq júıesine kedergi keltirýi múmkin ekenin jasyrmady. Al, mundaı jaǵdaıda mektepke vakına pasportyn kórsetý arqyly kirýge bolady deıdi.
Sáken Qalqamanov, Túrkistan oblysy ákiminiń orynbasary: «Bizde 56 paıyz Túrkistan oblysynda ınternetpen qamtamasyz etilmegen, álsiz. Ondaı jerlerde dástúrli túrde vakınaııasymen pasportty qarap sanıtarlyq normaǵa sáıkes kirgize beremiz balalardy. Negizi bylttyr da biz 180 mektepti dástúrli túrde oqytqanbyz. Sol kúıinde solaı oqyta beremiz».
Qazirgi tańda oblys boıynsha 78 mekteptiń qurylysy júrgizilip jatyr. Ári bıyl óńirdegi 2 apatty jáne bir úsh aýysymdy bilim uıalarynyń máselesi sheshimin tabady. Qalǵan 7 apatty jáne úsh aýysymdy mektep qurylysy 2023 jylǵa josparlanyp otyr deıdi sala jaýaptylary. Sondaı-aq bıyl birińǵaı mektep formasy qajet emes ekendigin atap ótken oblys ákiminiń orynbasary oqýshynyń kıimi klassıkalyq úlgide bolýy shart ekenin eskertti.
Sáken Qalqamanov, Túrkistan oblysy ákiminiń orynbasary: «Balalar klassıkalyq túrde mektepke barýy kerek. Ol degenimiz ne? Shalbar, djınsy emes. Sporttyq shalbarlar emes. Klassıkalyq qara nemese kók shalbar jáne aq kóılek. Ústine kostıým kııýi mindetti emes. Biraq, qara nemese kók rýbashka nemese svıter sııaqty kıim kıip kelý kerek. Mynaý qyzdardyń kórinisi. Astynda ıýbka nemese shalbar. Aq kóılek, blýzka kofta. Eshqandaı oramal, eshqandaı hıdjab degen bolmaıdy. Ol klassıkalyq forma emes».
Aıta keteıik, balalar qaýipsizdigin kúsheıtý maqsatynda oblystaǵy 400 mektepke tolyǵymen beınebaqylaý ornatylypty. Endi bilim uıalaryndaǵy qaýipsizdik tikeleı tártip saqshylarynyń baqylaýynda bolady.
