18 قاراشادا الماتىعا Pfizer (Comirnaty) كومپانياسى شىعارعان COVID-19-عا قارسى ۆاكتسينانىڭ كەزەكتى پارتياسى كەلدى. جۇك قۇرامىنا 266 760 دوزا كىردى. Pfizer كومپانياسىمەن جۇرگىزىلگەن كەلىسسوزدەردىڭ قورىتىندىسى بويىنشا بىرىڭعاي ديستريبيۋتور بارلىعى 4 ملن.230 مىڭ دوزا ساتىپ الدى.
قابىنۋعا قارسى پرەپاراتتى امەريكاندىق Pfizer كومپانياسى جانە گەرمانيانىڭ BioNTech تەحنولوگيالىق كومپانياسى شىعارعان. Comirnaty Pfizer/BioNTech ۆاكتسيناسىن ددۇ-ى شۇعىل پايدالانۋعا رۇقسات ەتىلگەن.
كەلگەن ۆاكتسينا قر دسم سەبك-ءنىڭ رۇقساتتاماسىنا سايكەس جەدەل تۇردە ەلىمىزدىڭ وڭىرلەرىنە جىبەرىلدى.
Comirnaty ۆاكتسيناسىن جەتكىزۋ تىكەلەي وبلىستىق دەنساۋلىق ساقتاۋ باسقارمالارىنىڭ قويمالارىنا جۇزەگە اسىرىلادى. ۆاكتسينالاردى تاسىمالداۋ "سۋىق تىزبەك" قاعيداتى بويىنشا جۇرگىزىلەدى — ءاربىر كەزەڭدە تەمپەراتۋرالىق رەجيمدى قاتاڭ ساقتاۋ قامتاماسىز ەتىلەدى. سونىمەن قاتار، ءار دەڭگەيدە ءوزىنىڭ جاۋاپتى ۇيىمى جانە جاۋاپتى تۇلعالارى بار.
ۆاكتسينا لوگيستيكاسىنىڭ وپەراتورى - Comirnaty ۆاكتسيناسىن تاسىمالداۋعا مامانداندىرىلعان Pfizer كومپانياسىنىڭ سەرىكتەسى بولىپ تابىلاتىن UPS حالىقارالىق لوگيستيكالىق كومپانياسى. UPS كومپانياسى ۆاكتسينالاردى ۋلترا تومەن تەمپەراتۋرالىق رەجيمدى قولدايتىن "Pfizer" كومپانياسىنىڭ "Softbox" ارنايى تاسىمالداۋ كونتەينەرلەرىندە تاسىمالدايدى.
«ادىرنا» ۇلتتىق پورتالى
