قاسىم-جومارت توقاەۆتىڭ الماتى قالاسىنا جۇمىس ساپارى قارجى سەكتورىنىڭ وكىلدەرىمەن كەزدەسۋدەن باستالدى. مەملەكەت باسشىسىنىڭ الماتىداعى رەزيدەنتسياسىندا وتكەن جيىنعا پرەزيدەنت اكىمشىلىگىنىڭ باسشىلىق قۇرامى، مەملەكەتتىك ورگانداردىڭ، ءىرى قارجى قۇرىلىمدارى مەن بانكتەردىڭ باسشىلارى قاتىستى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
مەملەكەت باسشىسى اتوم ەنەرگەتيكاسىن دامىتۋدىڭ وزەكتىلىگىنە، سونىڭ ىشىندە اتوم ەلەكتر ستانتسياسىن سالۋ ماسەلەسىنە دە توقتالدى.
– تۇپتەپ كەلگەندە، ءبىز بۇل ماسەلەگە قاتىستى ناقتى شەشىمگە كەلەمىز دەپ ويلايمىن. قازاقستاندا ەلەكتر ەنەرگياسىنىڭ تاپشىلىعىنىڭ العاشقى بەلگىلەرى قازىردىڭ وزىندە بايقالادى. ارينە، ەلەكتر قۋاتىنىڭ جاپپاي جەتىسپەۋشىلىگى تۋىنداعان جوق. ازىرگە تەپە-تەڭدىك بار. الايدا العاشقى بەلگىلەرى بىلىنۋدە. سوندىقتان بولاشاقتى ويلاساق، ءبىز اتوم ستانتسياسىنىڭ قۇرىلىسىنا قاتىستى ناقتى شەشىم قابىلداۋىمىز كەرەك. باسشىنىڭ مىندەتى دە ءتيىمدى شەشىم قابىلداۋ، – دەدى پرەزيدەنت.
«ادىرنا» ۇلتتىق پورتالى
