اتىراۋدا «ساسىق ساي» اتالىپ كەتكەن بۋلانۋ القابىنىڭ جارتىسى تولىقتاي قۇرعاتىلدى. بۇل جۇمىس اتىراۋ مۇناي وڭدەۋ زاۋىتىنىڭ سول جەردى قالپىنا كەلتىرۋگە ارنالعان «تازالىق» جوباسى اياسىندا ىسكە اسۋدا دەپ حابارلايدى Forbes.kz.
«سايدى ءتورت بولىككە ءبولىپ، ءبىرىنشى سەكتوردى تولىعىمەن قۇرعاتتىق. ەكىنشىسى 95 پايىزعا اياقتالدى. وندا ازداعان كولەمدە سۋ قالادى. ءبىز ونى كەيىن سورىپ الامىز. ازىرگە ول جەرگە تەحنيكا بارا المايدى. سۋدىڭ تولىقتاي اعىپ كەتۋى ءۇشىن ۋاقىت قاجەت» دەيدى اتىراۋ مۇناي وڭدەۋ زاۋىتىنىڭ قۇرىلىستى ۇيىمداستىرۋ ءبولىمى باسشىسىنىڭ ورىنباسارى قانات ساعىزباەۆ.
ونىڭ ايتۋىنشا، 2022 جىلى ءبىرىنشى جانە ەكىنشى سەكتورلارداعى قامىس شابىلىپ، جەرى جىرتىلىپ، رەكۋلتيۆاتسيالاندى. تيىسىنشە مۇناي قالدىقتارى گەكتارىنا ءبىر توننادان بولىنەتىن بيولوگيالىق ءونىم ارقىلى تازارتىلادى. بۇل پرەپارات نەگىزگى لاستاۋشى مۇناي ونىمدەرىن جويۋعا كومەكتەسەدى. سودان كەيىن توپىراق قۇرامى ازوتى بار تىڭايتقىشتارمەن بايىتىلادى. وسىلايشا قارا جەرگە كوڭىل اۋدارعاننىڭ ارقاسىندا سول ماڭدا وسىمدىكتەردىڭ تابيعي تۇردە قايتا باس كوتەرۋىنە مۇمكىندىك پايدا بولادى.
«العاشقى ەكى-ءۇش جىلدا نەگىزىنەن قامىس وسەدى جانە ول جەردى جاقسى تازارتادى. سودان كەيىن باسقا ءشوپ شىعا باستايدى» دەيدى قانات ساعىزباەۆ.
بۋلانۋ القابىنىڭ ەكىنشى-ءۇشىنشى سەكتورىن قۇرعاتۋ 2022 جىلى باستالادى. ونىڭ رەكۋلتيۆاتسياسى دا 2023 جىلعا دەيىن العاشقىداعىداي سحەمامەن جۇزەگە اسادى. كەيىن بىرنەشە جىل قاتارىنان ماماندار زياندى زاتتاردىڭ ازايۋ ديناميكاسىن قاداعالاپ، مونيتورينگ جۇرگىزەتىن بولادى.
قازىرگى ۋاقىتتا اتىراۋ مۇناي وڭدەۋ زاۋىتىنان بولىنەتىن قالدىق سۋ بۋلانۋ القابىنا توگىلىپ جاتىر. جاقىندا ۋاقىتشا جابىق قۇبىر ىسكە قوسىلعان سوڭ، 3 جارىم شاقىرىمعا سوزىلعان اشىق كانال قۇرعاتىلادى. ال ونىڭ ورنىنا ەكى تۇربا تارتىلادى. ونىڭ بىرەۋى قوسالقى قىزمەت اتقارادى. دەگەنمەن قۇبىرلار «ساسىق سايعا» ەمەس، قالانىڭ كارىزدىك تازارتۋ جۇيەسىنە قاراي باعىتتالعان.
«اعىن سۋدىڭ 15 پايىزى قايتا پايدالانىلادى. ەگەر سۋدى تازالاۋ بارىسىندا ساپانىڭ جوعارى كورسەتكىشى بايقالسا، قايتا پايدالانىلاتىن سۋدىڭ كولەمىن ارتتىراتىن مۇمكىندىك بار» دەپ تۇيىندەدى ءسوزىن قانات ساعىزباەۆ.
«ساسىق ساي» – قالانىڭ سول جاعالاۋىنان شىعاتىن اعىن سۋلار مەن ءوندىرىس قالدىقتارى جينالاتىن بۋلانۋ الاڭى. ونىڭ 476 گەكتارى اكىمدىككە، 860 گەكتارى اتىراۋ مۇناي وڭدەۋ زاۋىتىنا تيەسىلى.
2021 جىلدىڭ ءساۋىر ايىندا زاۋىت بۋلانۋ القابىنىڭ وزىنە تيەسىلى بولىگىن قالپىنا كەلتىرۋگە جانە اعىن سۋلاردى توقتاتۋعا باعىتتالعان «تازالىق» جوباسىن ىسكە اسىرۋدى باستادى. جوبانى قارجىلاندىرۋدى «ەۋروپالىق قايتا قۇرۋ جانە دامۋ بانكى» موينىنا الىپ، جوبانى جۇزەگە اسىرۋ ءۇشىن 80 ميلليون اقش دوللارىن بولۋگە دايىن ەكەنىن ءبىلدىردى.
«ادىرنا» ۇلتتىق پورتالى
