Atyraýda «Sasyq saı» atalyp ketken býlaný alqabynyń jartysy tolyqtaı qurǵatyldy. Bul jumys Atyraý munaı óńdeý zaýytynyń sol jerdi qalpyna keltirýge arnalǵan «Tazalyq» jobasy aıasynda iske asýda dep habarlaıdy Forbes.kz.
«Saıdy tórt bólikke bólip, birinshi sektordy tolyǵymen qurǵattyq. Ekinshisi 95 paıyzǵa aıaqtaldy. Onda azdaǵan kólemde sý qalady. Biz ony keıin soryp alamyz. Ázirge ol jerge tehnıka bara almaıdy. Sýdyń tolyqtaı aǵyp ketýi úshin ýaqyt qajet» deıdi Atyraý munaı óńdeý zaýytynyń qurylysty uıymdastyrý bólimi basshysynyń orynbasary Qanat Saǵyzbaev.
Onyń aıtýynsha, 2022 jyly birinshi jáne ekinshi sektorlardaǵy qamys shabylyp, jeri jyrtylyp, rekýltıvaııalandy. Tıisinshe munaı qaldyqtary gektaryna bir tonnadan bólinetin bıologııalyq ónim arqyly tazartylady. Bul preparat negizgi lastaýshy munaı ónimderin joıýǵa kómektesedi. Sodan keıin topyraq quramy azoty bar tyńaıtqyshtarmen baıytylady. Osylaısha qara jerge kóńil aýdarǵannyń arqasynda sol mańda ósimdikterdiń tabıǵı túrde qaıta bas kóterýine múmkindik paıda bolady.
«Alǵashqy eki-úsh jylda negizinen qamys ósedi jáne ol jerdi jaqsy tazartady. Sodan keıin basqa shóp shyǵa bastaıdy» deıdi Qanat Saǵyzbaev.
Býlaný alqabynyń ekinshi-úshinshi sektoryn qurǵatý 2022 jyly bastalady. Onyń rekýltıvaııasy da 2023 jylǵa deıin alǵashqydaǵydaı shemamen júzege asady. Keıin birneshe jyl qatarynan mamandar zııandy zattardyń azaıý dınamıkasyn qadaǵalap, monıtorıng júrgizetin bolady.
Qazirgi ýaqytta Atyraý munaı óńdeý zaýytynan bólinetin qaldyq sý býlaný alqabyna tógilip jatyr. Jaqynda ýaqytsha jabyq qubyr iske qosylǵan soń, 3 jarym shaqyrymǵa sozylǵan ashyq kanal qurǵatylady. Al onyń ornyna eki turba tartylady. Onyń bireýi qosalqy qyzmet atqarady. Degenmen qubyrlar «sasyq saıǵa» emes, qalanyń kárizdik tazartý júıesine qaraı baǵyttalǵan.
«Aǵyn sýdyń 15 paıyzy qaıta paıdalanylady. Eger sýdy tazalaý barysynda sapanyń joǵary kórsetkishi baıqalsa, qaıta paıdalanylatyn sýdyń kólemin arttyratyn múmkindik bar» dep túıindedi sózin Qanat Saǵyzbaev.
«Sasyq saı» – qalanyń sol jaǵalaýynan shyǵatyn aǵyn sýlar men óndiris qaldyqtary jınalatyn býlaný alańy. Onyń 476 gektary ákimdikke, 860 gektary Atyraý munaı óńdeý zaýytyna tıesili.
2021 jyldyń sáýir aıynda zaýyt býlaný alqabynyń ózine tıesili bóligin qalpyna keltirýge jáne aǵyn sýlardy toqtatýǵa baǵyttalǵan «Tazalyq» jobasyn iske asyrýdy bastady. Jobany qarjylandyrýdy «Eýropalyq qaıta qurý jáne damý banki» moınyna alyp, jobany júzege asyrý úshin 80 mıllıon AQSh dollaryn bólýge daıyn ekenin bildirdi.
«Adyrna» ulttyq portaly
