جەلىدە Salەm Social جارىققا شىعارعان تاعى ءبىر ۆەب سەريال كەڭ تانىمالدىلىققا كەنەلۋدە. بۇل جولعى سەريال 90-جىلدارداعى ادام ءولتىرۋ ىسىمەن اينالىسقان مانياكتاردىڭ جانتۇرشىگەرلىك ىستەرى جونىندە تۇسىرىلگەن "5:32" تۋىندىسى. ول قالاي ءتۇسىرىلدى؟ نە تۋرالى؟
سيۋجەت تەرگەۋشى شالقاردىڭ ءومىر تاريحىنا نەگىزدەلگەن، ول 90-شى جىلدارى جان تۇرشىگەرلىك كىسى ولتىرۋلەر تىزبەگىن تەرگەپ، كەيىن پوليتسيا سەريالى مانياكتى ۇستاي الماعان. اراعا جىلدار سالىپ، قاتىگەز قىلمىسكەر تاعى دا سول ارەكەتىن قالادا جالعاستىرادى. ونى ۇستاۋ ءۇشىن ءىستىڭ جاڭا تەرگەۋشىسى ءامىر تاجىريبەلى ماماننىڭ كومەگىنە جۇگىنەدى. قارت، شارشاعان شالقار تاعى دا ەسكى جاۋدىڭ ىزىنە تۇسەدى. جاۋىزدى جاۋاپقا تارتا الا ما؟
يدەيا اۆتورى، پروديۋسەر ءارى رەجيسسەر اليشەر ۋتەۆتىڭ ايتۋىنشا، ول كوپ جىلدار بويى ەرەكشە اتاۋداعى جوبانى ويلاپ جۇرگەن:
«5:32» ۆەب-سەريالى راسىمەن دە ەرەكشە، ويتكەنى ول شىنايى وقيعالارعا نەگىزدەلگەن. ءبىز بار اڭگىمەلەردىڭ فاكتىلەرىن زەرتتەۋدىڭ ۇزاق جۇمىستارىن جۇرگىزدىك. ءاربىر ەپيزودتا مانياكتىڭ ناقتى ءپروتوتيپى نەمەسە بىرنەشە ادامنىڭ جالپى بەينەسى بولادى» دەدى ول باق-قا بەرگەن سۇحباتىندا.
اليشەر ۋتەۆتى وتاندىق كينويندۋستريانىڭ مايتالمانى دەپ اتاۋعا بولادى، ويتكەنى ونىڭ قازاق كينويندۋسترياسىنداعى قادامى ءساتتى بولۋدا. ءدال ونىڭ ستسەناريلەرىنەن ەڭ كوپ كىرىس اكەلگەن وتاندىق ەكى فرانشيزا – «بيزنەس پو كازاحسكي» جانە «برات يلي براك» ءبىر ۋاقىتتا ۇزدىك تۋىندىلارعا اينالدى. ال بيىل اقان ساتاەۆ تا تاسپالاعان 90-جىلداردىڭ تاقىرىبىن ۋتەۆ قايتا جاڭعىرتتى.
12 سەريالى «5:32» ۆەب-سەريالىندا باستى ءرولدى ءابىلمانسۇر سەرىكوۆ سومدادى، ول جاس تەرگەۋشى شالقاردى سومدايدى. سونداي-اق جوبادا 90-جىلدارداعى جاس شالقاردىڭ سەرىكتەسى دۋماندى سومداۋ اكتەر قوبىلاندى بولاتقا بۇيىرىپتى.
ءتۇسىرىلىم جۇمىستارى جامبىل وبلىسىندا، تارازدان 60 شاقىرىم جەردەگى قاراتاۋ مەن جاڭاتاس قالالارىندا بولدى. نەگىزىنەن ۆەب-سەريالدى 40 كۇن ءتۇسىرۋ جوسپارلانعان.
جوبانىڭ العاشقى سەرياسى 12-قاراشادا جارىق كوردى. بۇگىندە ميلليوننان استام قارالىم جيناپ ۇلگەردى.
ۆەب-سەريال قاتاڭ تۇردە 21 جاستان اسقان ادامدارعا عانا كورۋگە رۇقسات ەتىلەتىنى جانە جۇرەگى ءالسىز، اياعى اۋىر جاندارعا ۇسىنىلمايتىنى ەسكەرتىلەدى. سەريالدا شىنايى وقيعانىڭ اتموسفەراسىن ماكسيمالدى تۇرعىدا جەتكىزۋ ءۇشىن اشىق كورىنىستەر ءجيى تۇسىرىلگەن.
"ادىرنا" ۇلتتىق پورتالى
