جانەرە پىرىمبەتوۆانىڭ تازالىقشى بولىپ جۇمىس ىستەگەنىنە 10 جىلدان اسقان. بۇرىن ول «تازا قالا» جشس-دا ەڭبەك ەتىپتى. قازىر «سامعاۋ-2030» جشس-دا جۇمىس ىستەيدى. اقتوبە قالاسىنداعى ماسكەۋ اۋدانىنىڭ كوشەلەرىن سىپىرىپ، كۇل-قوقىستان تازالايدى. ونىڭ ايتۋىنشا، قازىر ونىڭ «موينىندا» 30-عا جۋىق كوشە بار. تاڭنان كەشكە دەيىن ەرىنبەي، تازالىق جۇمىستارىمەن اينالىساتىن ول بىزگە جۇمىسى، وتباسى تۋرالى ايتىپ بەردى.
— مەن وسىدان 20 جىل بۇرىن قاراقالپاقستاننان اقتوبە قالاسىنا كوشىپ كەلدىم. 2000 جىلدارى كوپتەگەن باۋىرلارىمىز ەلگە قونىس اۋدارعان تۇستا ءبىز دە، جولداسىم ەكەۋمىز بالا-شاعامىزبەن وسى ولكەگە كوشىپ كەلدىك. مەملەكەت قارجىلاي كومەكتەسىپ، سودان ساياجايدان شاعىن ءۇي ساتىپ الدىق. قازىر سول ۇيدە تۇرىپ جاتىرمىن. ءوزىم كوپ بالالى انامىن. جاسىم 58-دە. ون جىلدان بەرى تازالىقشى بولىپ جۇمىس جاساپ كەلەمىن. جولداسىم ءبىراز جىل بۇرىن قايتىس بولدى. ءتورت قىزىم، ەكى ۇلىم بار. وتباسىندا نەمەرە ءسۇيىپ وتىرعان باقىتتى اجەمىن. كەزىندە تۇراقتى جۇمىس ىزدەپ جۇرگەنىمدە مەملەكەتتىك مەكەمە وكىلدەرى تازالىقشى بولىپ جۇمىس ىستەۋدى ۇسىندى. سودان، مىنە، تازالىقشى بولىپ ەڭبەك ەتىپ كەلەمىن. جۇمىس ۋاقىتى — تاڭەرتەڭ 8.00-دەن كەشكى 17.00-گە دەيىن. وزىمىزگە بەلگىلەنگەن اۋماقتى، ونىڭ ىشىندە جول جيەكتەرىن، كوشەلەردى، كونتەينەرلەر الاڭدارىن كۇل-قوقىستان تازارتامىز. ايتەۋىر كۇنى بويى تىنىم تاپپايمىز، — دەيدى ول.
جانەرە پىرىمبەتوۆا تىنىم تاپپاي، ەڭبەك ەتكەنىنە اي سايىن 100 مىڭ تەڭگە جالاقى الاتىنىن ايتادى. مەرەكە كۇندەرى سەرىكتەستىك باسشىلىعى سىياقى دا بەرەدى ەكەن. قازىر بۇل مەكەمەدە 4 تازالىقشى ايەل بار. ولاردىڭ ءبارى بۇعان دەيىن دە تازالىق جۇمىسىمەن اينالىساتىن مەكەمەلەردە جۇمىس ىستەگەن. قازىر جانەرە اپا قاسىنداعى «ەگىزى» (جۇرت سولاي اتاپ كەتكەن-اۆت.) تاميرا نۋرۋشەۆا ەكەۋى ا.يمانوۆ كوشەسىن قوقىستان تازارتىپ ءجۇر.
— «ەڭبەكتىڭ نانى ءتاتتى» دەمەكشى، ەڭبەكتەنگەن ادام دالادا قالمايدى. جۇمىستىڭ وڭايى جوق. بارلىق جەردە قيىندىق بولادى. ءبىز جازدا قوقىس جينايمىز، قىستا قار تازارتامىز. قۋاناتىنىمىز، جۇمىستان كەيىن مەكەمەنىڭ كولىگى ۇيىمىزگە اپارىپ تاستايدى، قاجەتتى ارنايى كيىمدەرىمىزدى الىپ بەرەدى. باسشىلىق مەرەكە سايىن سىياقى تاعايىنداپ، «ۇلكەن كىسىلەر عوي» دەپ ءبىزدى سىيلايدى. سوعان ريزامىز. ءوزىم كۇمىس القاسى بار انا بولعانمەن، بالالارعا قول جايماي، وسىلاي ەڭبەك ەتكەندى دۇرىس كورەمىن. نەگىزگى ماماندىعىم دۇكەنشى بولعانمەن، ساۋدا سالاسىندا كوپ جۇمىس جاساعان جوقپىن. جاس كەزىمدە بالا تاربيەسىمەن اينالىسىپ، ءۇي شارۋاشىلىعىندا بولدىم. وسىلايشا ءومىر بويى ءۇي مەن ءتۇز تىرلىگىنەن قول ۇزبەي كەلە جاتىرمىن، — دەيدى ول.
ءسوز اراسىندا تازالىقشى اپا تۇرعىنداردىڭ كوبى قوقىس الاڭدارىن ءىرى كولەمدەگى قۇرىلىس ماتەريالدارى مەن جيھازدارعا تولتىرىپ تاستايتىنىن، ولاردى جيناۋ ءۇشىن ءبىراز الەكتەنەتىنىن جەتكىزدى. نەگىزى ەسكى جيھازداردى، قۇرىلىس ماتەريالدارىنىڭ قالدىقتارىن، تاعى باسقا ءىرى گاباريتتى قوقىستى تۇرعىنداردىڭ وزدەرى پوليگونعا اپارۋى كەرەك.
— كەيبىر تۇرعىندار قوقىستى كەز كەلگەن جەرگە تاستاي سالادى. قورشاعان ورتاعا، قالانىڭ تازالىعىنا جاۋاپكەرشىلىكپەن قارامايدى. مەنىڭشە، تازالىق ءار اۋلادان باستالادى. سوندىقتان قاي كەزدە دە قالامىزعا، قورشاعان ورتاعا جاناشىر بولايىق، — دەيدى جانەرە اپا.
ايتا كەتۋ كەرەك، جانەرە پىرىمبەتوۆا ەڭبەك ەتەتىن «سامعاۋ-2030» جشس-ى قالامىزداعى تازالىققا جاۋاپ بەرەتىن وزگە دە سەرىكتەستىكتەر سياقتى جولدار مەن كوشەلەردى، تۇرعىن ۇيلەر اۋماعىن سانيتارلىق تازالاپ، اباتتاندىرۋ جۇمىسىمەن اينالىسادى. قازىر بۇل مەكەمەدە شتاتتىق رەجيمدە 30-عا جۋىق ادام جۇمىس ىستەيدى. سونداي-اق تەحنيكالاردى جۇرگىزەتىن جۇرگىزۋشىلەرى جانە بار.
د.بايمۇقاش،
«ادىرنا» ۇلتتىق پورتالى.
