Tynym tappaıtyn tazalyqshy

1984
Adyrna.kz Telegram

Janere Pirimbetovanyń tazalyqshy bolyp jumys istegenine 10 jyldan asqan. Buryn ol  «Taza qala» JShS-da eńbek etipti. Qazir «Samǵaý-2030» JShS-da jumys isteıdi. Aqtóbe qalasyndaǵy Máskeý aýdanynyń kóshelerin sypyryp, kúl-qoqystan tazalaıdy. Onyń aıtýynsha, qazir onyń «moınynda» 30-ǵa jýyq kóshe bar. Tańnan keshke deıin erinbeı, tazalyq jumystarymen aınalysatyn ol bizge jumysy, otbasy týraly aıtyp berdi.

— Men osydan 20 jyl buryn Qaraqalpaqstannan Aqtóbe qalasyna kóship keldim. 2000 jyldary kóptegen baýyrlarymyz elge qonys aýdarǵan tusta biz de, joldasym ekeýmiz bala-shaǵamyzben osy ólkege kóship keldik. Memleket qarjylaı kómektesip, sodan saıajaıdan shaǵyn úı satyp aldyq. Qazir sol úıde turyp jatyrmyn. Ózim kóp balaly anamyn. Jasym 58-de. On jyldan beri tazalyqshy bolyp jumys jasap kelemin. Joldasym biraz jyl buryn qaıtys boldy. Tórt qyzym, eki ulym bar. Otbasynda nemere súıip otyrǵan baqytty ájemin. Kezinde turaqty jumys izdep júrgenimde memlekettik mekeme ókilderi tazalyqshy bolyp jumys isteýdi usyndy. Sodan, mine, tazalyqshy bolyp eńbek etip kelemin. Jumys ýaqyty — tańerteń 8.00-den keshki 17.00-ge deıin. Ózimizge belgilengen aýmaqty, onyń ishinde jol jıekterin, kóshelerdi, konteınerler alańdaryn kúl-qoqystan tazartamyz. Áıteýir kúni boıy tynym tappaımyz, — deıdi ol.

Janere Pirimbetova tynym tappaı, eńbek etkenine aı saıyn 100 myń teńge jalaqy alatynyn aıtady. Mereke kúnderi seriktestik basshylyǵy syıaqy da beredi eken. Qazir bul mekemede 4 tazalyqshy áıel bar. Olardyń bári buǵan deıin de tazalyq jumysymen aınalysatyn mekemelerde jumys istegen. Qazir Janere apa qasyndaǵy «egizi» (jurt solaı atap ketken-avt.) Tamıra Nýrýsheva ekeýi A.Imanov kóshesin qoqystan tazartyp júr.

— «Eńbektiń nany tátti» demekshi, eńbektengen adam dalada qalmaıdy. Jumystyń ońaıy joq. Barlyq jerde qıyndyq bolady. Biz jazda qoqys jınaımyz, qysta qar tazartamyz. Qýanatynymyz, jumystan keıin mekemeniń kóligi úıimizge aparyp tastaıdy, qajetti arnaıy kıimderimizdi alyp beredi. Basshylyq mereke saıyn syıaqy taǵaıyndap, «úlken kisiler ǵoı» dep bizdi syılaıdy. Soǵan rızamyz. Ózim kúmis alqasy bar ana bolǵanmen, balalarǵa qol jaımaı, osylaı eńbek etkendi durys kóremin. Negizgi mamandyǵym dúkenshi bolǵanmen, saýda salasynda kóp jumys jasaǵan joqpyn. Jas kezimde bala tárbıesimen aınalysyp, úı sharýashylyǵynda boldym. Osylaısha ómir boıy úı men túz tirliginen qol úzbeı kele jatyrmyn, — deıdi ol.

Sóz arasynda tazalyqshy apa turǵyndardyń kóbi qoqys alańdaryn iri kólemdegi qurylys materıaldary men jıhazdarǵa toltyryp tastaıtynyn, olardy jınaý úshin biraz álektenetinin jetkizdi. Negizi eski jıhazdardy, qurylys materıaldarynyń qaldyqtaryn, taǵy basqa iri gabarıtti qoqysty turǵyndardyń ózderi polıgonǵa aparýy kerek.

— Keıbir turǵyndar qoqysty kez kelgen jerge tastaı salady. Qorshaǵan ortaǵa, qalanyń tazalyǵyna jaýapkershilikpen qaramaıdy. Menińshe, tazalyq ár aýladan bastalady. Sondyqtan qaı kezde de qalamyzǵa, qorshaǵan ortaǵa janashyr bolaıyq, — deıdi Janere apa.

Aıta ketý kerek, Janere Pirimbetova eńbek etetin «Samǵaý-2030» JShS-y qalamyzdaǵy tazalyqqa jaýap beretin ózge de seriktestikter sııaqty joldar men kóshelerdi, turǵyn úıler aýmaǵyn sanıtarlyq tazalap, abattandyrý jumysymen aınalysady. Qazir bul mekemede shtattyq rejımde 30-ǵa jýyq adam jumys isteıdi. Sondaı-aq tehnıkalardy júrgizetin júrgizýshileri jáne bar.

D.BAIMUQASh,

«Adyrna» ulttyq portaly.

Pikirler