قانسوناردا بۇركىتشى شىعادى اڭعا،
تاستان تۇلكى تابىلار اڭدىعانعا.
جاقسى ات پەن تاتۋ جولداس — ءبىر عانيبەت،
ىڭعايلى ىقشام كيىم اڭشى ادامعا.
اباي
وسى جەكسەنبىدە ايراقتى تاۋىنىڭ ەتەگىندە «اتا كاسىپ – اڭشىلىق» اتتى قۇسبەگىلىك پەن ساياتشىلىقتى ناسيحاتتاۋعا ارنالعان شارا ءوتتى. «وتپان» مەملەكەتتىك كاسىپورنى ۇجىمىنىڭ ۇيىمداستىرۋىمەن وتكەن سونارعا وتپان تاۋدىڭ ەتەگىندەگى تۇششىبەك اۋىلىنىڭ قۇسبەگىلەرى مەرەكە وتەعاليەۆ، وتەجان سوۆەتوۆ، ەرتىس ەسجانوۆ، ايشۋاق تايمانوۆ پەن بىرقاتار تازى يەلەرى قاتىستى.
— ماڭعىستاۋدا بەس-التى بۇركىتشى بار. وڭىردە ۇلتتىق سپورتتى ناسيحاتتاۋ، ءتۋريزمدى دامىتۋ ماقساتىندا ساياتشىلىققا كوڭىل بولىنۋدە, — دەيدى ۇلتتىق ءداستۇردى جانداندىرىپ جۇرگەن بۇركىتشى مەرەكە وتەعاليەۆ.
م. وتەعاليەۆتىڭ قۇسبەگىلىكپەن اينالىسىپ جۇرگەنىنە 5-6 جىلدىڭ ءجۇزى بولعان. ول 2016 جىلى جامبىل وبلىسىندا وتكەن «قاۋىرسىن» كلۋبىنىڭ 35 جىلدىعىنا ارنالعان رەسپۋبليكالىق جارىستا قۇرمەت گراموتاسىمەن ماراپاتتالعان. بۇركىتتى اڭعا سالۋدان مول تاجىريبەسى بار ول بالاپاندى باپتاۋدىڭ قۇپياسىمەن ءبولىستى:
— ۇيادان شىققان بالاپاندى كەلەسى جىلى جارىستارعا قاتىستىرا بەرۋگە بولادى. بۇل كەزدە ول تۇلكى، قويان الا باستايدى. اڭعا سالۋ ءۇشىن ءۇشىن قۇستى جاز بويى مايلى، قۇنارلى تاماق بەرىپ، سەمىرتىپ، قاۋىرسىنىن تۇلەتەمىز دە، قانسوناردىڭ الدىندا 30-40 كۇن بۇرىن ارىقتاتامىز. ويتكەنى «توق بۇركىت تۇلكى المايدى». بىراق بىردەن ارىتۋعا بولمايدى. بابى كەلىسپەگەن بۇركىت اڭعا تۇسپەيدى. ول ءۇشىن قىزىل ەتتى جىلى سۋعا سالىپ، قانىنان ايىرىپ، تولىق اعارتىپ بەرەمىز. مۇنى اقجەم دەپ اتايدى. ەرتەڭ اڭعا شىعادى دەگەن كۇنى بۇركىتتىڭ ءىشىن تازالاۋ ءۇشىن قويا، ياعني كيىز جۇتقىزامىز. كيىز قويا مايدى ءسىڭىرىپ، بۇركىتتى ءىش مايىنان ارىلتادى, — دەيدى ول.
ۇيىمداستىرۋشىلار شارانى وتكىزۋدەگى ماقسات تاريحى تەرەڭدە جاتقان بەكزات ونەردى ناسيحاتتاۋ، تەلەفونعا تەلمىرگەن جاستاردى قازاقى ونەرگە قىزىقتىرۋ ارقىلى «رۋحاني جاڭعىرۋ» باعدارلاماسىن ىسكە اسىرۋ ەكەنىن ايتادى.
— قۇسبەگىلىكتى ءتۋريزمنىڭ كوزى رەتىندە دامىتپاقپىز. بولاشاقتا بۇرىنعى سالت بويىنشا سالبۋرىن، ياعني اڭشىلار مەن ونەرپازداردىڭ بىرىگىپ اڭعا شىعۋ ءداستۇرىن جانداندىرۋ دا جوسپارلانىپ وتىر. تۇلكى الپىس ەكى ايلالى دەسەك تە، بۇگىن بۇركىتشىلەردىڭ قانجىعاسى مايلاندى, — دەدى «وتپان» مكقك وكىلى قۇرالاي ىزىمبەرگەنوۆا.
بۇل كۇنى اڭشىلار ولجالى قايتتى. بۇعان دەيىن ءتورت رەت ۇيىمداستىرىلعان شاراعا باستاماشى بولىپ جۇرگەندەردىڭ ءبىرى «وتپان» تاريحي-مادەني كەشەنىنىڭ قىزمەتكەرى جومارت ايداربەكتىڭ ايتۋىنشا، شارا اۋەلدە قۇسبەگىلەردىڭ كەزدەسۋىنەن باستالعان.
— بۇل شارا سوڭعى 4-5 جىلدا ءداستۇرلى تۇردە ۇيىمداستىرىلىپ كەلەدى. اۋەلدە قۇسبەگىلەردىڭ كەزدەسۋىنەن باستالعان ەدى. بۇگىندە تۇششىبەك اۋىلىندا 4-5 بۇركىتشى بار. وسى تاۋدىڭ ماڭايىنداعى اۋىل مەكتەپتەرىنىڭ وقۋشىلارى قۇسبەگىلىكپەن تانىسىپ وتىر. بۇگىن وتپان تاۋىنىڭ ەتەگىنەن ايراقتى تاۋىنا دەيىن باردىق. سونارعا ماڭعىستاۋ، تۇپقاراعان اۋداندارىنىڭ اۋىلدارىنان، قۇرىق پەن سايىن اۋىلدارىنان تازىلارىن ەرتىپ جىگىتتەر كەلدى. قانجىعامىز مايلاندى. ماقساتىمىز – اتا-بابادان كەلە جاتقان بەكزات ونەر ساياتشىلىقتى ناسيحاتتاۋ ەدى. بۇگىن سول سول ماقساتقا جەتكەندەيمىز, — دەدى ول.
“رۋحاني جاڭعىرۋ” باعدارلاماسى اياسىندا
ماڭعىستاۋ وبلىستىق مادەنيەت، مۇراعات
جانە قۇجاتتاما باسقارماسى مەن “ادىرنا”
ۇلتتىق پورتالىنىڭ بىرلەسكەن جوباسى
