7 قاراشادا نۇر-سۇلتانداعى ەڭبەك مينيسترلىگى الدىنا ءبىر توپ ايەل زەينەت جاسىن تومەندەتۋدى تالاپ ەتىپ، اكتسيا وتكىزدى، دەپ حابارلايدى "ادىرنا" ۇلتتىق پورتالى دەرەككوزگە سىلتەپ.
ولار "قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي ايەلدەرگە راقىمشىلىق جاريالانسىن! ايەلدەر بۇرىنعىشا 58 جاستا زەينەتكە شىعارىلسىن!" دەگەن جازۋى بار پلاكاتتار ۇستاپ تۇردى.
نارازى ايەلدەردىڭ اكتسياسىن ەكى اۆتوبۋستا وتىرعان ارنايى جاساق پەن پوليتسيا باقىلادى. ەسىل اۋدانى اكىمدىگىنىڭ وكىلى اكتسيانىڭ زاڭسىز ەكەنىن بىرنەشە رەت ەسكەرتتى.
نارازىلىققا قاتىسۋشىلاردىڭ ءبىرى كەنجەش سەمباەۆا اكتسيا تۋرالى اكىمدىككە الدىن الا حابار بەرگەنىن، بىراق اكىمدىك رۇقسات ەتپەگەنىن ايتادى.
- زاڭ بويىنشا اكىمدىككە ەسكەرتتىك. رۇقسات بەرمەسە دە شىقتىق، سەبەبى ميتينگ بولاتىنى تۋرالى الەۋمەتتىك جەلىدە حابارلاپ قويعانبىز. ەلۋدەن استام ادام كەلەتىن بولعان. پوليتسيانى جەكسەنبىدە جينالعانىمىز قاتتى الاڭداتقان ءتارىزدى،- دەيدى ول.
اكتسياعا التى ادام قاتىسىپ، ءبىر ساعاتقا جەتپەي تارقادى.
ايەلدەردىڭ زەينەت جاسىنىڭ ۇلعايعانىنا نارازىلىق بىلدىرگەن بۇل توپ 1 قازاندا دا وسىعان ۇقساس پلاكاتتارمەن شىققان ەدى. ول جولى ەڭبەك مينيسترلىگىنىڭ وكىلى ارنايى جۇمىس توبىن قۇرىپ، ايەلدەر تالابىن تالقىلاۋدى ۇسىنعان.
زەينەت جاسىن تومەندەتۋدى تالاپ ەتكەن ايەلدەر قوزعالىسىن ۇيىمداستىرۋشىلاردىڭ ءبىرى مايكەن بەكارىستانوۆا وتكەن ايداعى ۋادە ءسوز جۇزىندە قالدى دەيدى.
- بىزبەن ZOOM پلاتفورماسىندا ءمينيستردىڭ ءبىرىنشى ورىنباسارى اقمادي سارباسوۆ كەزدەستى. بىراق بىزگە ءسوز بەرمەي، ءوزى سويلەپ كەتىپ قالدى. جۇمىس توبى دا قۇرىلمادى. پارلامەنتكە، بۇرىنعى پرەزيدەنت نۇرسۇلتان نازارباەۆقا، "قازاقستان حالىق پارتياسىنا" حات جولدادىق. تەك ەڭبەك مينيسترلىگىنەن "زەينەت جاسى تومەندەمەيدى" دەگەن جاۋاپ الدىق. كۇرەسىمىزدى توقتاتپايمىز، -دەيدى مايكەن بەكارىستانوۆا.
قازاقستاندا 2018 جىلدان باستاپ ەرلەر مەن ايەلدەردىڭ زەينەت جاسى تەڭەستىرىلە باستاعان. زاڭعا سايكەس، 2027 جىلدان باستاپ ايەلدەردىڭ زەينەت جاسى جىل سايىن جارتى جىلدان كوبەيەدى. بۇرىن ايەلدەر 58 جاستا شىقسا، ەندى 63 جاستا شىعاتىن بولادى. ال ەرلەر زەينەتكە بۇرىنعىشا 63 جاستا زەينەتكە شىعادى.
"ادىرنا" ۇلتتىق پورتالى
ۇقساس جاڭالىقتار
