ءۇش عاسىر بويى ورىسقا بودان بولىپ كەلدىك. نەگە؟ قارىم-قابىلەتى تومەن، اقىلى تاياز حالىق بولعاندىقتان دەيمىسىز؟ جوق، كەرىسىنشە، جەتى اتاسىنا دەيىن قانى ارالاسپايتىن گەنى تۇنىق حالىقتان ءتۋابىتتى دارىندار باسقا حالىقتارعا قاراعاندا كوپ شىعادى. 50 عاسىرلىق تاريحى بار (مۇنى انتروپولوگ ورازاق سماعۇل اعامىز عىلىمي جولمەن دالەلدەگەن) قازاق حالقى نەبىر زۇلماتتاردان وسى كۇنگە دەيىن امان ساقتالىپ كەلە جاتۋىنىڭ ءبىر سىرى دا، بالكىم ەرەكشە جاراتىلىسىندا بولار.
قازاق 300 جىل بويى عىلىم-بىلىمنەن كەنجەلەپ قالدى.توپتى جارعان تابيعي دارىندار عىلىم كەڭىستىگىندە جارقىراپ كورىنە المادى. ولاردىڭ جارقىراپ كورىنۋىنە ءوزىمىز دە، وزگەلەر دە مۇددەلى بولعان جوق.
وزگەلەر وندايلاردىڭ كوزىن جويۋعا تىرىستى. جويدى دا.
ءوزىمىز قادىرىنە جەتە المادىق. باس كوتەرگەندەرىن توبەسىنەن باستىق، تومەن كەتكەندەرىن شاشىنان تارتتىق. ۇستاپ بەردىك، اتقىزدىق، اسقىزدىق، جاۋىز پيعىلدىڭ جۇزەگە اسۋىنا كومەكتەستىك. كورەالماۋشىلىق، ىشتارلىق، وزىمشىلدىك جەلكەلەپ العان.
ءالى سولايمىز. ەگەمەندىگىمىزگە قول جەتكىزىپ، ەتەك-جەڭىمىزدى جيناعان شاقتا اسىلدارىمىزدى قادىرلەپ، قاستەرلەۋگە كوڭىل بولسەك بولماس پا ەدى؟ دارىندى تۇلعانىڭ پارقى نەگە باعالانبايدى؟ جارق ەتكەن جۇلدىزدارىمىزدى ماپەلەپ ساقتاۋ دەگەن نيەت نەگە جوق؟
ادەتتە جارق ەتىپ كوزگە تۇسكەندەردى وزگەلەر ءىلىپ اكەتەدى. قانشاسى شەتەلدە تەر توگىپ ءجۇر.
الەم جۇرتىن جالت قاراتقان دارىن يەسى ديماشقا مەملەكەتتىك كۇزەت ۇيىمداستىرا الماي جۇرگەنىمىز اناۋ.
ال اقنازار مىڭ جىلدا ءبىر تۋىلاتىن دانىشپان بالا ەدى عوي! حالىقارالىق دەڭگەيدەگى 18 ماتەماتيكالىق وليمپيادانىڭ جەڭىمپازى، SAT subject سىناعىندا 2400 مۇمكىنشىلىكتەن 2400 بالل جيناعان (بۇرىن-سوڭدى تاريحتا بولماعان كورسەتكىش). بيلل گەيتستىڭ نازارىنا ىلىككەن بالا.
الەمنىڭ اۋزىن ايعا بىلەگەن ماتەماتيكتەرى يگەرە المايتىن فورمۋلالاردى كوزىن جۇمىپ وتىرىپ شەشەتىن بالاعا مەكتەپ بىتىرمەي جاتىپ-اق دۇنيە ءجۇزىنىڭ ءدۇبىرلى ۋنيۆەرسيتەتتەرى تەگىن گرانت ۇسىنىپ، تالاسا شاقىرعان.
ءالى ەسىمدە، نەمەرەسىنىڭ جەتىستىگىنە جۇرەگى جارىلا قۋانعان كۋرستاسىم ءماريام قاي ۋنيۆەرسيتەتتى تاڭدارىمىزدى بىلمەي وتىرمىز دەپ قوڭىراۋ شالعانى.
كوپ ويلانىپ، گارۆاردتى تاڭداعان.
ەكىنشى كۋرسىندا وقيتىن. پاندەمياعا بايلانىستى الماتىدا ونلاين وقىپ جۇرگەن.
ەندى ول جوق. اي مەن كۇننىڭ امانىندا، ساپ-ساۋ جۇرگەن بالادان ايىرىلىپ قالدىق. نە بولعانى بەلگىسىز.
مۇنداي دانىشپان، دارا تۋعان جاستارىمىز كوپ ەمەس. مەملەكەت قامقورلىعىنا الىپ، قاۋىپ-قاتەردەن ساقتاۋدىڭ جولدارىن قاراستىرۋعا بولماس پا ەدى؟
ءبىزدىڭ ەل قاشان اسىل تۋعان ازاماتتارىن ارداقتاپ، كوزىنىڭ قاراشىعىنداي ساقتاۋدى قولعا الادى؟
گۇلماريا بارمانبەكوۆا،
"ادىرنا" ۇلتتىق پورتالى.
