تاڭەرتەڭ پوليكلينيكاعا اناليز تاپسىرۋعا باردىم. 28 بەن 50 جاس ارالىعىنداعى كىلەڭ قازاق. ءبارى جوعارى ءبىلىمدى. ويتكەنى بۇل كلينيكا پرەزيدەنتتىڭ ءىس باسقارماسىنا قارايدى. دەمەك ءبارى مەملەكەتتىك قىزمەتكەرلەر. "سوڭى كىم؟" - دەپ سۇرادىم، تالون بەرەتىن اپپارات ىستەن شىققانى كورىنىپ تۇر. ءبارى ودىرايا قارادى. شاماسى مىناۋ نە ايتىپ تۇر دەسە كەرەك. . "سوڭى كىم؟ اۋىزدارىڭا قۇم قۇيىپ العانبىسىڭدار؟ سوڭى قايسىنىڭ؟" ەندى ءتۇسىندى، بىلەم.
-يا!-دەدى. شامالاعان بولۋى كەرەك، كەزەك سۇراعانىمدى. سونىمەن ۇزىن-سونار كەزەكتە تۇرمىز. سەنەسىز بە؟ بىردە-ءبىر قازاق ءوز تىلىندە كەزەك سۇرامادى، ءتىپتى سويلەمەدى دە. بارلىعى 100% ورىس تىلىندە عانا قارىم-قاتىناس جاساپ تۇر. ءبىر ادام، ءبىر پەندە ءوز انا تىلىندە ءتىل قاتپادى. بۇل نە؟.. كىنا كىمدە؟.. كىنا قازاقتىڭ وزىندە. قازاق ءوزىن سىيلامايدى. قازاقتا نامىس جوق. بۇگىن جىلاعىم كەلدى. ۇيگە ارەڭ جەتتىم. كوڭىلىم قالدى.
ادەبيەتتە دراماتۋرگيا دەگەن جانر بار. سول جانردا ىشكى كونفليكت بولماسا الگى جانردىڭ باسقا جانردان ەرەكشەلىگى جوق. ىشكى كونفليكت ادام تابيعاتىمەن بىتە قايناسقان. سانا - كونفليكت، ەموتسيا-كونفليكت، ءتان - كونفليكت. ماڭگىلىك كۇرەس!!! سانا ماڭگىلىك ارپالىستا (كونفليكتىدە) ەموتسيا دا سول...ايقاي سالعىڭ كەلەدى، شىڭعىرعىڭ كەلەدى. بىراق جاسىراسىڭ، ىشىڭە جاسىراسىڭ. ءتان دە سول... مۇگەدەكتىگىن، كەمشىلىگىن جاسىرىپ، سىرتقا ءسان كورىنۋگە قۇشتارلىق...بۇل ءتاننىڭ كونفليكتىسى.
قۇداي-اۋ، بۇگىن ىشكى كونفليكتىدەن جۇرداي ءوز قوعامىمنىڭ كەيىپكەرلەرىن كوردىم! ساناسىندا ، ەموتسياسىندا ، تانىندە ىشكى كونفليكت جوق. ىشكى كونفليكتىسى جوق ادام ولىك!!! ۇلت رەتىندە تىم بولماعاندا ءىشىمىزدى، ىشكى قۇپيامىزدى، ىشكى قارسىلىقتى دا ساقتاي الماپپىز. ءىشى، سىرتىن بىردەي بەرە سالعان جىپ-جىلماعاي، تۇگى جوق ادامداردى كوردىم. ءوزىن-ءوزى قورلىققا شەككەن، كوندىككەن، بولاشاعىنان قورىقپايتىن، الاڭدامايتىن، مەملەكەتى تۇرماق، ۇلتى تۇرماق ءوز قارا باسىنىڭ، بالاسىنىڭ قامىن ويلاۋ سانادا اتىمەن جوق، ءار نارسەگە ءبىر الدانا سالاتىن اۋەسقوي، كىرەسىلى-شىعاسىلى عانا ەسى بار ايەلدەردى، ەركەكتەردى كوردىم... انىعىندا "اتا-انالاردى" كوردىم. شوشىدىم!!!
"ادىرنا" ۇلتتىق پورتالى
