الماتىدا قاراعاندىلىق ۇرى سكانەردىڭ كومەگىمەن بوتەننىڭ كولىگىنەن 20 ميلليون تەڭگە ۇرلاپ كەتتى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
بۇل جولى بۇرىن مۇلىكتىك قىلمىس جاساعانى ءۇشىن سوتتالعان قاراعاندى وبلىسىنىڭ 51 جاستاعى تۇرعىنى كوزگە ءتۇستى.
– بۇل قىلمىس 28 قازان كۇنى ساعات 10:30-دا ورىن الدى. ت.ەسىمدى ازامات گوگول مەن تولەباەۆ كوشەلەرىنىڭ قيىلىسىندا تۇرعان Mercedes كولىگىنىڭ سالونىنا زاڭسىز كىرىپ، سول جەردەن جاسىرىن تۇردە 20 ميلليون تەڭگە اقشا ۇرلاعان. كۇدىكتى قاراعاندى وبلىسىندا ۇستالدى. ەر ادام ۇرلانعان اقشانىڭ ءبىر بولىگىن جەكە قاجەتتىلىكتەرىنە جۇمساعانى انىقتالدى. قالعانى تاركىلەنىپ، قر قك-ءنىڭ 188-بابى 3-بولىگى بويىنشا مەدەۋ اۋداندىق پب تەرگەپ جاتقان قىلمىستىق ءىس ماتەريالدارىنا قوسا تىركەلدى، – دەدى الماتى قالالىق پد باستىعىنىڭ ورىنباسارى بەرىك ابىلبەكوۆ.
ونىڭ ايتۋىنشا، قاسكۇنەم دابىلدى سكانەرلەۋ ارقىلى بوتەننىڭ كولىگىن اشقان. وسى قىلمىسقا باسقا دا ادامداردىڭ قاتىستىلىعى انىقتالۋدا.
«ادىرنا» ۇلتتىق پورتالى