جەڭىل سالماقتاعى قازاقستاندىق بوكسشى ۆيكتور كوتوچيگوۆكە ساۋتگەمپتوندا وتەتىن جەكپە-جەككە دايىندىق كەزىندە شابۋىل جاسالىپ، اۋرۋحاناعا ءتۇستى دەپ حابارلايدى "ادىرنا" ۇلتتىق پورتالى "Vesti.kz" سايتىنا سىلتەمە جاساپ.
بوكسشىنىڭ ايتۋىنشا، بەلگىسىز بىرەۋلەر ونىڭ بولمەسىنە باسىپ كىرىپ، "قىشقىل" شاشقان، كەيىن ول بىرنەشە كۇن اۋرۋحانادا جاتۋعا ءماجبۇر بولعان. جەكپە-جەك 11 جەلتوقسانعا جوسپارلانعان ەدى.
"انگلياداعى وقۋ-جاتتىعۋ جيىنى ءبىراز ءساتسىز بولدى. قىسقاشا ايتسام: 11 جەلتوقسانعا جوسپارلانعان جەكپە-جەككە دايىندالۋ ءۇشىن انگلياعا ۇشىپ كەلدىم. بولمە جالداپ، جاتتىعۋدى باستادىم. ءتورت كۇن ءوتتى. ءبىر كۇنى ۇيدە ۇيىقتاپ جاتقانىمدا ەسىك سىرتىنان دىبىس ەستىلدى. بىرەۋ قۇلىپتى اشۋعا تىرىسىپ جاتتى. مەن اتىپ تۇرىپ پىشاق الماق بولدىم، بىراق اس ۇيدە شانىشقى مەن قاسىقتان باسقا ەشتەڭە بولمادى. ەسىك اشىلدى دا بىرنەشە ادام كىرىپ كەلدى. ويلانباستان توبەلەسكە دايىندالىپ تۇرعانىمدا ولار ماعان قىشقىلعا ۇقساس سۇيىقتىق شاشىپ جىبەردى. مەن دەنەم اۋىرعاندىقتان ەڭكەيىپ قالدىم، ال ولار تەز شىعىپ كەتتى. ءبىرىنشى جاتتىقتىرۋشىنى شاقىردىم. ول تۇندە كەلىپ، مەنى اۋرۋحاناعا اپاردى، قامقورلىق جاسادى، سول ءۇشىن وعان مىڭ العىس! بىرنەشە كۇن اۋرۋحانادا دارىگەرلەر باقىلاۋىندا بولدىم. ەشكىممەن جانجالداسپادىم، كىمگە كەرەك بولعانىن بىلمەيمىن. بار تۇسىنگەنىم، جاتتىعۋ جيىندارىنا سەنىمدى جەرلەرگە بارۋ كەرەك ەكەن", - دەپ جازدى كوتوچيگوۆ Instagram-پاراقشاسىندا.
MTK Global مەنەدجەرلەرى "قازاق پاتشاسى" دەپ اتاعان كوتوچيگوۆ كەيىنگى جەكپە-جەگىن 12 ناۋرىزدا وتكىزىپ، ۇلىبريتانيالىق گەري كالليدەن نوكاۋتپەن جەڭىلىپ قالدى.
بۇل قازاقستاندىقتىڭ قاتارىنان ەكىنشى جانە مانسابىنداعى العاشقى جەڭىلىسى بولدى. بۇعان دەيىن ول دۋبايدا تاعى ءبىر ۇلىبريتانيالىق بوكسشى ماكسي حيۋزدەن جەڭىلىپ، WBC International تيتۋلىنان ايىرىلعان بولاتىن.
"ادىرنا" ۇلتتىق پورتالى.
