Jeńil salmaqtaǵy qazaqstandyq boksshy Vıktor Kotochıgovke Saýtgemptonda ótetin jekpe-jekke daıyndyq kezinde shabýyl jasalyp, aýrýhanaǵa tústi dep habarlaıdy "Adyrna" ulttyq portaly "Vesti.kz" saıtyna silteme jasap.
Boksshynyń aıtýynsha, belgisiz bireýler onyń bólmesine basyp kirip, "qyshqyl" shashqan, keıin ol birneshe kún aýrýhanada jatýǵa májbúr bolǵan. Jekpe-jek 11 jeltoqsanǵa josparlanǵan edi.
"Anglııadaǵy oqý-jattyǵý jıyny biraz sátsiz boldy. Qysqasha aıtsam: 11 jeltoqsanǵa josparlanǵan jekpe-jekke daıyndalý úshin Anglııaǵa ushyp keldim. Bólme jaldap, jattyǵýdy bastadym. Tórt kún ótti. Bir kúni úıde uıyqtap jatqanymda esik syrtynan dybys estildi. Bireý qulypty ashýǵa tyrysyp jatty. Men atyp turyp pyshaq almaq boldym, biraq as úıde shanyshqy men qasyqtan basqa eshteńe bolmady. Esik ashyldy da birneshe adam kirip keldi. Oılanbastan tóbeleske daıyndalyp turǵanymda olar maǵan qyshqylǵa uqsas suıyqtyq shashyp jiberdi. Men denem aýyrǵandyqtan eńkeıip qaldym, al olar tez shyǵyp ketti. Birinshi jattyqtyrýshyny shaqyrdym. Ol túnde kelip, meni aýrýhanaǵa apardy, qamqorlyq jasady, sol úshin oǵan myń alǵys! Birneshe kún aýrýhanada dárigerler baqylaýynda boldym. Eshkimmen janjaldaspadym, kimge kerek bolǵanyn bilmeımin. Bar túsingenim, jattyǵý jıyndaryna senimdi jerlerge barý kerek eken", - dep jazdy Kotochıgov Instagram-paraqshasynda.
MTK Global menedjerleri "qazaq patshasy" dep ataǵan Kotochıgov keıingi jekpe-jegin 12 naýryzda ótkizip, ulybrıtanııalyq Gerı Kallıden nokaýtpen jeńilip qaldy.
Bul qazaqstandyqtyń qatarynan ekinshi jáne mansabyndaǵy alǵashqy jeńilisi boldy. Buǵan deıin ol Dýbaıda taǵy bir ulybrıtanııalyq boksshy Maksı Hıýzden jeńilip, WBC International tıtýlynan aıyrylǵan bolatyn.
"Adyrna" ulttyq portaly.
