ءبىلىم جانە عىلىم ءمينيسترى اسحات ايماعامبەتوۆ جۇمىس ساپارىمەن اقتوبە وبلىسىنا كەلدى. ساپار بارىسىندا اسحات ايماعامبەتوۆ دەنساۋلىق ساقتاۋ، ءبىلىم بەرۋ، سپورت جانە ينفراقۇرىلىمدى دامىتۋ سالالارىنداعى "اۋىل – ەل بەسىگى" باعدارلاماسى اياسىنداعى جوبالاردىڭ جۇزەگە اسىرىلۋ بارىسىمەن تانىستى دەپ حابارلايدى "ادىرنا" ۇلتتىق پورتالى.
سارجانساي اۋىلىندا مەردىگەرلىك ۇيىمدار جۇرگىزىپ جاتقان اۋىل ىشىلىك كوشە جولدارىن جوندەۋ جۇمىستارى قارالدى. بۇل جوبالار دا "اۋىل – ەل بەسىگى" باعدارلاماسىنىڭ ءبىر بولىگى بولىپ تابىلادى. اۋىلدا اتقارىلعان جۇمىستارمەن تانىسىپ شىعىپ، مارتوك اۋىلىنا باردى. مينيستر دەنە شىنىقتىرۋ-ساۋىقتىرۋ كەشەنىندە بولدى.
"اۋىل – ەل بەسىگى" باعدارلاماسى اياسىندا سالىنعان 160 ورىندىق كەشەن فۋتزال، ۆولەيبول، باسكەتبول جانە باسقا دا ويىندار بويىنشا جاتتىعۋلار مەن جارىستار وتكىزۋگە ارنالعان.
اسحات ايماعامبەتوۆ مارتوك اۋدانىنداعى قازان اۋىلىندا بولىپ، جەرگىلىكتى مەديتسينالىق پۋنكتىڭ جۇمىسىمەن تانىستى. "اۋىل – ەل بەسىگى" باعدارلاماسى شەڭبەرىندە پايدالانۋعا بەرىلگەن مەديتسينالىق نىسان ءبىر اۋىسىمدا 40 ادام ءۇشىن مەديتسينالىق قىزمەت كورسەتۋگە شاقتالعان.
مينيستر سونداي-اق وبلىستىڭ بىرنەشە اۋىلدىق مەكتەبىنە بارىپ، وندا ءبىلىم بەرۋ نىساندارىنىڭ جاي-كۇيىن ەگجەي-تەگجەيلى زەردەلەدى. اسحات ايماعامبەتوۆ بولعان ءبىلىم بەرۋ ۇيىمدارىنىڭ اراسىندا مارتوك اۋدانىنىڭ حلەبوداروۆكا اۋىلدىق مەكتەبى بولدى. قازىر مەكتەپتە كۇردەلى جوندەۋ جۇمىستارى جۇرگىزىلىپ جاتىر.
وقۋ ورنىندا ەدەندەردى جوندەۋ جانە اۋىستىرۋ، جىلىتۋ جانە جارىقتاندىرۋ جۇيەلەرىن اۋىستىرۋ، ىشكى جانە سىرتقى ارلەۋ، كارىز جۇيەسىن جوندەۋ جانە اباتتاندىرۋ بويىنشا جۇمىستار جۇرگىزىلۋدە. بۇگىنگى تاڭدا مەكتەپتەگى 95 مۇعالىم 574 وقۋشىنى ءبىلىم نارىمەن سۋسىنداتادى.
مينيستر قارعالى اۋدانىندا دا بولدى. پەتروپاۆلوۆكا اۋىلىندا "اۋىل – ەل بەسىگى" باعدارلاماسى اياسىندا مەردىگەر ۇيىم جۇرگىزىپ جاتقان كوشەلەردى جارىقپەن قامتاماسىز ەتۋ جۇمىستارىن كوردى. سونداي-اق مينيستر پەتروپاۆلوۆكا اۋىلىندا جەرگىلىكتى مەكتەپتىڭ ماتەريالدىق-تەحنيكالىق بازاسىمەن تانىسىپ، مەكتەپ ۇجىمىمەن كەزدەسۋ وتكىزدى.
ءمينيستردىڭ جۇمىس ساپارى حرومتاۋ اۋدانىندا جالعاستى. اقجار اۋىلىندا ول "جۇمىسپەن قامتۋ جول كارتاسى – 2020" جانە "اۋىل – ەل بەسىگى" باعدارلامالارى شەڭبەرىندە جوندەلگەن 11 كەنتىشىلىك كوشەنىڭ اۆتوموبيل جولدارىن قاراپ شىقتى.
سونىمەن قاتار مينيستر "اۋىل – ەل بەسىگى" باعدارلاماسى اياسىندا پايدالانۋعا بەرىلگەن دەنە شىنىقتىرۋ-ساۋىقتىرۋ كەشەنىنىڭ جۇمىسىمەن تانىستى.
اسحات ايماعامبەتوۆ حرومتاۋ تاۋ-كەن تەحنيكالىق جوعارى كوللەدجىنىڭ ماتەريالدىق-تەحنيكالىق بازاسىمەن تانىسۋ ءۇشىن حرومتاۋ قالاسىنا باردى. مينيستر اقتوبە وبلىسىنا جۇمىس ساپارىن حرومتاۋ اۋدانىنىڭ اكىمدىگىندە قورىتىندىلادى.
اقتوبە وبلىسىندا سوڭعى 3 جىلدا "اۋىل – ەل بەسىگى" باعدارلاماسى اياسىندا 42 اۋىلدا جالپى سوماسى 11,8 ملرد تەڭگەنى قۇرايتىن 108 جوبا ىسكە اسىرىلدى. ولاردى جۇزەگە اسىرۋ بارىسىندا 2 072 جۇمىس ورنى، ونىڭ ىشىندە 278 تۇراقتى جۇمىس ورنى قۇرىلدى.
بيىل جالپى سوماسى 6,1 ملرد تەڭگەنى قۇرايتىن 69 جوبا ىسكە اسىرىلىپ جاتىر.
بۇل جوبالار "اۋىل – ەل بەسىگى" باعدارلاماسى شەڭبەرىندە باسىمدىق بەرىلگەن 33 اۋىلداعى (26 تىرەك، 6 سپۋتنيكتىك جانە 1 ستراتەگيالىق اۋىل) 30 مىڭ تۇرعىننىڭ ءومىر ساپاسىن جاقسارتۋعا مۇمكىندىك بەرەدى.
"ادىرنا" ۇلتتىق پورتالى.
