قازاقستاندىق زاڭگەر-ستۋدەنتتەر ويىن تۇرىندە وتكەن حالىقارالىق سوت پروتسەسىندە جەڭىسكە جەتتى. بايقاۋ جىل سايىن «استانا» حالىقارالىق قارجى ورتالىعى مەن حالىقارالىق تورەلىك ورتالىعىنىڭ ۇيىمداستىرۋىمەن وتەدى.
ستۋدەنتتەر اراسىنداعى AIFC Court and IAC Annual Moot زاڭگەرلىك جارىسى قازاقستاندا بيىل ءتورتىنشى رەت ءوتتى. بايقاۋدىڭ كوروناۆيرۋس پاندەمياسىنا بايلانىستى ونلاين فورماتتا ءوتۋى وزگە ەلدەردىڭ ءبىلىم الۋشىلارىنا دا قاتىسۋعا مۇمكىندىك بەردى. بيىل كوماندالار سانى ەرەكشە كوپ، قازاقستان، قىزعىز رەسپۋبليكاسى، رەسەيدىڭ دە ۋنيۆەرسيتەتتەرىنەن ستۋدەنتتىك توپتار قاتىستى.
Cوت وتىرىسى فورماتىنداعى سايىس جالپى (اعىلشىن) قۇقىق سوتىندا احقو سوتىنىڭ قازىرگى سۋديالارى-لوردتاردىڭ توراعالىعىمەن تولىعىمەن اعىلشىن تىلىندە ءوتتى. اتالعان جارىستا زاڭگەر-ستۋدەنتتەر پراكتيكالىق ماسەلەنى جالپى قۇقىق تۇرعىسىنان زەرتتەيدى، جازباشا جانە اۋىزشا ارگۋمەنتتەر دايىندايدى، سوت ءىسىن جۇرگىزۋ داعدىلارىن جەتىلدىرەدى.
2021 جىلعى بايقاۋدىڭ ىرىكتەۋ كەزەڭىنىڭ ناتيجەسى بويىنشا فينالعا قازاقستان (م.س. نارىكباەۆ اتىنداعى كازگيۋ ۋنيۆەرسيتەتى) جانە رەسەي (ورال مەملەكەتتىك زاڭ ۋنيۆەرسيتەتى) وكىلدەرى شىقتى. ءبىرىنشى ورىندى كازگيۋ كومانداسىنىڭ ستۋدەنتتەرى يەلەندى.
«ىرىكتەۋ كەزەڭىندە كوماندامىز كاسپي ۋنيۆەرسيتەتىن (قازاقستان) جەڭدى. بايقاۋعا سونداي-اق ورتالىق ازياداعى امەريكا ۋنيۆەرسيتەتى (قىرعىزستان), نارحوز ۋنيۆەرسيتەتى (قازاقستان), ل.ن. گۋميلەۆ اتىنداعى ەۋرازيا ۇلتىق ۋنيۆەرسيتەتى (قازاقستان), حالىقارالىق «الا-توو» ۋنيۆەرسيتەتى (قىرعىزستان), كيمەپ ۋنيۆەرسيتەتى (قازاقستان) دە قاتىستى. ستۋدەنتتەرىمىزدى ماقتانىش ەتەمىن! بۇل – وقىتۋشىلاردىڭ، جوعارى قۇقىق مەكتەبى ۇجىمىنىڭ قارقىندى جۇمىسىنىڭ ناتيجەسى»، - دەپ جازدى كازگيۋ ۋنيۆەرسيتەتىنىڭ رەكتورى سەرگەي پەن Facebook-تەگى پاراقشاسىندا.
«ادىرنا» ۇلتتىق پورتالى
