پەنجىم اۋىلىنداعى جاعداي: بۇزاقىلىق پا، الدە ۇلتارالىق قاقتىعىس پا؟

546

الماتى وبلىسى پانفيلوۆ اۋدانىنا قاراستى پەنجىم اۋىلىندا مەكتەپ وقۋشىلارى اراسىندا بولعان جاپپاي توبەلەس الەۋمەتتىك جەلىگە تاراپ كەتتى. قازاق پەن ۇيعىر ۇلتى اراسىندا ءجيى بولىپ تۇراتىن "توبەلەس" نەدەن شىقتى؟  وقيعاعا بايلانىستى رەسمي تۇلعالار جاۋاپ بەردى دەپ حابارلايدى "ادىرنا" ۇلتتىق پورتالى.

پوليتسيا اقپاراتىنا سۇيەنسەك، 27 قازاندا پانفيلوۆ اۋدانىنداعى ورتالىق اۋرۋحاناعا دەنە جاراقاتىمەن 16 جاستاعى وقۋشى جەتكىزىلگەن. تەكسەرىس كەزىندە 9, 10, 11-سىنىپ وقۋشىلارى اراسىندا ەرەگىس باستالىپ، 20 شاقتى جاس توبەلەسكەنى انىقتالدى. ونىڭ ىشىندە ەكى ادام زارداپ شەككەن.

باس دارىگەردىڭ ورىنباسارى ەرجان قوجاحمەتوۆتىڭ ايتۋىنشا، 2005 جىلى تۋعان ءجاسوسپىرىم پانفيلوۆ اۋدانارالىق كوپسالالى اۋرۋحاناعا تۇسكەن. ول ميدىڭ اۋىر جاراقاتىن العان، وعان ەكىنشى نە ءۇشىنشى دارەجەلى تراۆماتيكالىق شوك دياگنوزى قويىلعان.

وسى وقيعادان كەيىن پەنجىم اۋىلىنا جەتكەن ءبىر توپ بيلىك وكىلى جەرگىلىكتى تۇرعىندارمەن جينالىس وتكىزدى. پانفيلوۆ اۋدانىنىڭ اكىمى تالعات ومىراليەۆ باستاعان اكىم-قارالار جينالعان جۇرتتىڭ پىكىرىن تىڭداپ، باسۋ ايتۋ ءۇشىن ەرتىپ كەلگەن قوعام قايراتكەرلەرى مەن اقىندارعا دا ءسوز بەرىلدى.

ت.ومىراليەۆتىڭ ايتۋىنشا، بۇدان استار ىزدەۋدىڭ قاجەتى جوق، بۇل – جاي عانا بۇزاقىلىق ارەكەت.

"روزىباقيەۆ اتىنداعى مەكتەپتە بالالار توبەلەسىپ، ءبىر بالا جاراقات الدى. ول بالانىڭ جاعدايىن كورىپ شىقتىم. تۇندە وتا جاسالىپتى. باسىنداعى گەماتومانى الىپ تاستادى. بۇل جەردە ەشقانداي ۇلتتىق ماسەلە جوق. وبلىس اكىمىنىڭ تاپسىرماسىمەن ارنايى شتاب قۇرىلدى. بۇل جاعدايدىڭ بولۋىنا نە الىپ كەلدى؟ ءبارىن تەكسەرەمىز. اۋىلدىڭ ازاماتتارىن جيناپ، پىكىرىن ءبىلىپ جاتىرمىز", – دەدى ول.

ال اۋىل ازاماتى اۋتجان حامراەۆ ەلدى مەكەندەگى بارلىق ۇلت وكىلدەرى بۇگىنگە دەيىن تاتۋ-ءتاتتى تۇرىپ جاتقانىن، الداعى ۋاقىتتا ءوزارا اۋىزبىرشىلىكتى ساقتاۋدا بىرلەسىپ ەڭبەك ەتىپ، بالالاردى سابىرعا، ءوزارا دوستىققا شاقىرۋعا ۇندەدى.

"كەشە بولعان وقيعانى كەيبىر ادامدار باسقا جاعىنان الەۋمەتتىك جەلىدە كورسەتىپ جاتىر. ءتىپتى، كەزدەيسوق ءورتتىڭ ءوزى كەشەگى وقيعانىڭ سالدارى سياقتى كورسەتىلدى. بىراق بۇل ولاي ەمەس، مۇنى ءبارىڭىز بىلەسىزدەر. جاستار، ءبىر-ءبىرىڭدى قۇرمەتتەڭدەر. ءبىز ءبىر جەردەن، ءبىر ەلدەنمىز. ءبىز — ۇلكەن وتباسىمىز", — دەدى اۋىل تۇرعىنى.

 

 

"ادىرنا" ۇلتتىق پورتالى

پىكىرلەر
رەداكتسيا تاڭداۋى