ءبىرتانوۆتىڭ قورعاۋشىسى قىلمىس "جاساعانى" راس پا؟

718

ەكس-دەنساۋلىق ساقتاۋ ءمينيسترى ەلجان ءبىرتانوۆتىڭ قورعاۋشىسى دميتري كۋرياچەنكونىڭ ۇستىنەن قىلمىستىق ءىس قوزعالدى دەپ حابارلايدى "ادىرنا" ۇلتتىق پورتالى.

ادۆوكاتتىڭ ايتۋىنشا، قارجىلىق مونيتورينگ اگەنتتىگى ونىڭ ۇستىنەن قىلمىستىق ءىستى زاڭسىز قوزعاعان. ادۆوكات كۋرياچەنكو رەسپۋبليكالىق ادۆوكاتتار القاسىنا جۇگىنىپ، كومەك سۇرادى.

قىلمىستىق ءىس ەرتەرەكتە قوزعالىپتى. قارجىلىق مونيتورينگ اگەنتتىگى "تەرگەۋ قۇپياسىن جاريا ەتتى، ءبىرتانوۆتىڭ ءىسىن تەرگەۋگە كەدەرگى كەلتىردى" دەگەن كۇدىكپەن بيىلعى جىلدىڭ 1 ساۋىرىندە ءىس قوزعاعان.

ادۆوكاتتىڭ ايتۋىنشا، تەرگەۋشىلەر ونىڭ ءۇيىن تىنتۋگە رۇقسات سۇراعان. الايدا سوت بۇعان رۇقسات ەتپەگەن. سونداي-اق، ادۆوكاتتىڭ ءىسى بويىنشا تەرگەۋشىلەر جۋرناليستەردى دە تەرگەۋگە شاقىرىپ، ادۆوكاتتىڭ ليتسەنزياسىن قايتارىپ الۋ تۋرالى ادىلەت دەپارتامەنتىنە حات جولداعان. تەرگەۋشىلەردىڭ بۇل جولى دا ماڭدايى تاسقا تىرەلگەندەي بولىپتى.

ءبىر قىزىعى، ءبىرتانوۆتىڭ ادۆوكاتىنىڭ سوزدەرىنەن زاڭعا قايشى ەشتەڭە تاپپاعاندىقتان قىلمىستىق ءىس قىسقارعان. ال ادۆوكاتتىڭ ءوزى بۇل ءىس تۋرالى تامىزدا عانا بىلگەن. بۇل جونىندە باس پروكۋراتۋراعا شاعىم جولدانىپ، تەرگەۋشىلەردى جاۋاپقا تارتۋدى تالاپ ەتىپتى.

رەسپۋبليكالىق ادۆوكاتتار القاسى دا اڭ-تاڭ. "بۇل – ادۆوكات د.كۋرياچەنكونىڭ قۇقىعىن ورەسكەل بۇزۋ", – دەپ مالىمدەدى ادۆوكاتتار القاسى.

 

"ادىرنا" ۇلتتىق پورتالى

پىكىرلەر
رەداكتسيا تاڭداۋى