Nur Otan: ءدارى-دارمەكتەرگە سالىقتىق جەڭىلدىكتەردى الىپ تاستاۋ باعانى كۇرت وسىرەدى

388

ۇلتتىق ەكونوميكا مينيسترلىگى ۇسىنعان «Nur Otan»-نىڭ سايلاۋالدى باعدارلاماسىن ورىنداۋ شارالارى پارتيا جانىنداعى ەكونوميكانى دامىتۋ جانە كاسىپكەرلىكتى قولداۋ جونىندەگى رەسپۋبليكالىق قوعامدىق كەڭەستىڭ وتىرىسىندا سىنعا ۇشىرادى.

اتاپ ايتقاندا، مينيسترلىك رەسپۋبليكالىق بيۋدجەتكە ءتۇسىمدى مولايتۋ ءۇشىن بىرقاتار سالىقتىق جەڭىلدىكتەردى الىپ تاستاۋدى ۇسىندى. الايدا كەڭەس توراعاسى، ءماجىلىس دەپۋتاتى امانجان جامالوۆتىڭ ايتۋىنشا، سالىقتىق جەڭىلدىكتەردى الىپ تاستاۋ باعانىڭ كۇرت وسۋىنە جانە ينۆەستيتسيالىق احۋالدىڭ ناشارلاۋىنا اكەلۋى مۇمكىن. مۇنداي شارالاردىڭ رەسپۋبليكالىق بيۋدجەت ءۇشىن پايداسى ماردىمسىز.

«مينيسترلىكتىڭ باياندامالارىن تىڭداساڭ، كوپ ءىس اتقارىلىپ جاتقان سەكىلدى، بىراق اۋىز تولتىرىپ ايتارلىقتاي دۇنيە جوق. بۇل جەڭىلدىكتەردى نە ءۇشىن الىپ تاستاۋ كەرەك ەكەنى تۇسىنىكسىز. دارىلىك زاتتار ءۇشىن قوسىمشا قۇن سالىعى بويىنشا بۇل جەڭىلدىكتىڭ ەكونوميكالىق اسەرى جوق دەپ جاتادى. بىراق قوسىمشا قۇن سالىعى تاۋاردىڭ باعاسىنا كىرمەي مە؟ جەڭىلدىكتەردى الىپ تاستاۋ ءدارى-دارمەك باعاسىنىڭ وسۋىنە اكەلەتىنى انىق»، - دەدى امانجان جامالوۆ.

پارتيانىڭ سايلاۋالدى ۋادەلەرى اياسىندا ققس مولشەرلەمەسىن سارالاۋ قاراستىرىلعان. ۇلتتىق ەكونوميكا ۆيتسە-ءمينيسترى ازامات ءامرين حابارلاعانداي، الەۋمەتتىك ماڭىزى بار تاۋارلارعا ققس-نىڭ تومەندەتىلگەن مولشەرلەمەسىن ەنگىزۋ، وسى سالىق ءتۇرىنىڭ جالپى مولشەرلەمەسىنىڭ وسۋىنە الىپ كەلەدى. الايدا، امانجان جامالوۆ بۇل ماسەلەلەردى ءبىر-بىرىمەن بايلانىستىرۋعا بولمايتىنىن اتاپ ءوتتى.

«وتكەن جىلى قازاقستاندا الەۋمەتتىك ماڭىزى بار تاۋارلارعا ققس 8%-عا تومەندەتىلگەن مولشەرلەمە قولدانىلدى. وسىلايشا، باعانىڭ وسۋىنە جول بەرىلمەدى. قازىر ينفلياتسيانىڭ ءوسۋىن ەسكەرسەك، بۇل ماسەلە اسا وزەكتى. ناتيجەسىنە كەلسەك، سالىق جينالىمى ءتىپتى ارتتى. ال ناقتى ققس  تومەندەتىلگەن مولشەرلەمەسىنەن بولعان شىعىندار، مينيسترلىكتىڭ باعالاۋى بويىنشا، بار بولعانى 9 ملرد. تەڭگەنى قۇرادى. سوندىقتان جالپى مولشەرلەمەنى كوتەرۋ بويىنشا تالاپ قويۋدىڭ قاجەتى جوق، سىزدەرگە ونداي تاپسىرما بەرىلمەگەن»، – دەدى كەڭەس توراعاسى ازامات امرينگە قاراتىپ.

ءوز كەزەگىندە قارجى ۆيتسە-ءمينيسترى باقتيار قوجاحمەتوۆ سالىقتىق جانە كەدەندىك اكىمشىلەندىرۋدى تسيفرلاندىرۋ بويىنشا جۇرگىزىلىپ جاتقان جۇمىستار تۋرالى باياندادى.

«وتكەن جىلدان باستاپ ونلاين باقىلاۋ-كاسسا ماشينالارىن (بكم) پايدالانۋعا كوشۋ جۇرگىزىلدى. بيىل «E-salyq-Business» ءموبيلدى قوسىمشاسى ارقىلى پيلوتتىق جوبا جۇزەگە اسىرىلۋدا. بارلىق جەردە تاۋار اينالىمىن باقىلاۋ ءۇشىن تاۋارعا ىلەسپە جۇكقۇجات ء(تىج) ەنگىزىلۋدە»، – دەدى باحتيار قوجاحمەتوۆ.

بۇل رەتتە، كەڭەس توراعاسى 2015 جىلدان بەرى ەلىمىزدە 660 مىڭنان استام قاتىسۋشى تىركەلگەن ەلەكتروندىق شوت-فاكتۋرالار جۇيەسى (ەشف) قارقىندى جۇمىس ىستەيتىنىن ەسكە سالدى.

«ءسىز ونلاين باقىلاۋ-كاسسالىق ماشينا، ەلەكتروندىق شوت-فاكتۋرا، تاۋارعا ىلەسپە جۇكقۇجات، ۆيرتۋالدى قويما جۇيەلەرى تۋرالى اۋىز تولتىرا ايتتىڭىز. بىراق كاسىپكەرلەردەن بۇل جۇيەلەردىڭ جۇمىسىنا قاتىستى ۇنەمى شاعىم تۇسەدى. ويتكەنى ولار ءبىر-بىرىنەن كوشىرەدى. ەگەر ەلەكتروندىق شوت-فاكتۋرالار تاۋارلاردى باقىلاۋدىڭ نەگىزى بولسا، وندا سونىڭ نەگىزىندە جۇمىس جۇرگىزىلۋى كەرەك. جاڭا جۇيەلەر مەن پيلوتتىق جوبالار ويلاپ تابۋدىڭ قاجەتى جوق. بيزنەسكە ولاردى پايدالانۋ ىڭعايلى بولۋى ءۇشىن جۇيەلەردى وڭايلاتۋ قاجەت. ال قازىر سىزدەر تەك كاسىپكەرلەردىڭ ۇرەيىن الىپ جۇرسىزدەر»، - دەدى امانجان جامالوۆ.

وتىرىس قورىتىندىسى بويىنشا ۇلتتىق ەكونوميكا مينيسترلىگىنە ۇسىنىلعان سالىق جەڭىلدىكتەرىنىڭ تىزبەسىن قايتا قاراۋ، سونداي-اق وندىرىستىك جانە الەۋمەتتىك ماڭىزى بار تاۋارلارعا ققس  مولشەرلەمەلەرىن سارالاۋ بويىنشا ناقتى ۇسىنىستار ەنگىزۋ ۇسىنىلدى.

قارجى مينيسترلىگىنە قولدانىستاعى جۇيەلەر مەن پيلوتتىق جوبالاردى جەڭىلدەتۋگە نازار اۋدارۋ جانە باسقا جۇيەلەرمەن قايتالانۋدى بولدىرماۋ ماقساتىندا «ەلەكتروندىق شوت-فاكتۋرالار» اقپاراتتىق جۇيەسى نەگىزىندە تاۋارلاردىڭ قاداعالانۋىن قامتاماسىز ەتۋ ۇسىنىلادى.

«ادىرنا» ۇلتتىق پورتالى

پىكىرلەر
رەداكتسيا تاڭداۋى