تۇركىستان قالاسى اكىمدىگى جانە “سەرپىلىس” قوعامدىق قورىنىڭ قولداۋىمەن 23 – 24 قازان كۇندەرى، قالا كۇنى قارساڭىندا، كىتاپقا دەگەن قۇشتارلىقتى ناسيحاتتاۋعا ارنالعان «پاراقTimes تۇركىستان تورىندە» كىتاپ جارمەڭكەسى ءوتتى، دەپ حابارلايدى "ادىرنا" ۇلتتىق پورتالى.
تۇركى الەمىنىڭ رۋحاني استاناسىنىڭ حالقىنا رۋحاني سەرپىلىس اكەلگەن بۇل جوبانى اۆتورى جۋرناليست بەيسەنكۋل نارىمبەتوۆا اپاي باستاپ، ەرلان ءجۇنىس، ەسبولات ايدابوسىن، سەرىكبول حاسان سەكىلدى رەسپۋبليكامىزعا بەلگىلى قالامگەرلەر قادىرلى قوناق بولىپ، كىتاپسۇيەر قاۋىمنىڭ ورتاق قۋانىشىنا اينالدى.
اباي قالشابەك، داۋرەن ايمانبەت، سۇندەت سەيىتوۆ ءوز كەزەگىندە وقىرماندارعا سۇبەلى سوزدەرىن ارناپ، پاراقTimes-تىڭ جوعارى دەڭگەيدە وتۋىنە ۇلەس قوستى.
«قىزمەت» باسپاسىنان شىققان پەرنەباي ساپار مىرزانىڭ «ولەيىن دەسەم اقشام جوق»، مادينا سابىر حانىمنىڭ «سايرامنان تۇركىستانعا دەيىن»، سالتانات ماديارقىزىنىڭ «شاحمات»، سەيدالى دۇيسەبايۇلىنىڭ «تۇركىستان عاجايىپتارى» كىتاپتارىنىڭ تۇساۋى شەشىلدى.
نۇر-سۇلتان، الماتى، قاراعاندى، شىمكەنت قالالارىنىڭ باسپا ۇيلەرى، كىتاپ دۇكەندەرى، كىتاپحانالارى وقىرمانمەن اشىق ديالوگ قۇرىپ، پىكىرلەسۋ الاڭشاسىندا اقىن-جازۋشىلارمەن جانە جاس قالامگەرلەرمەن كەزدەسۋلەر وتكىزدى. «قازاق ەنتسيكلوپەدياسى»، «قىزمەت»، «وتباسى حرەستوماتياسى»، «شاشۋ»، «KHAN COMICS»، «قازبىلىم»، «شىڭ» «Shugylakitap» باسپا ۇيلەرى، «KITAPAL»، «Qazyna» كىتاپ دۇكەندەرى مەن ى.التىنسارين اتىنداعى تۇركىستان وبلىستىق بالالار كىتاپحاناسى جانە فاراب كىتاپحاناسى كىتاپ الەمىنە وقىرماندارىمەن بىرگە ساياحات جاسادى.
ايتا كەتەيىك، ءىس-شارانىڭ نەگىزگى ماقساتى - قوعامنىڭ ينتەللەكتۋالدى الەۋەتى مەن مادەني قۇندىلىقتارىن، وسكەلەڭ ۇرپاقتىڭ رۋحاني-ادامگەرشىلىك ءبىلىمىن ارتتىرۋعا، جاستاردىڭ كىتاپ وقۋعا، كوركەم ادەبيەتكە دەگەن قۇشتارلىعىن وياتۋعا باعىتتالدى.
"ادىرنا" ۇلتتىق پورتالى
