Túrkistan qalasy ákimdigi jáne “Serpilis” qoǵamdyq qorynyń qoldaýymen 23 – 24 qazan kúnderi, qala kúni qarsańynda, kitapqa degen qushtarlyqty nasıhattaýǵa arnalǵan «ParaqTimes Túrkistan tórinde» kitap jármeńkesi ótti, dep habarlaıdy "Adyrna" ulttyq portaly.
Túrki áleminiń rýhanı astanasynyń halqyna rýhanı serpilis ákelgen bul jobany avtory jýrnalıst Beısenkýl Narymbetova apaı bastap, Erlan Júnis, Esbolat Aıdabosyn, Serikbol Hasan sekildi Respýblıkamyzǵa belgili qalamgerler qadirli qonaq bolyp, kitapsúıer qaýymnyń ortaq qýanyshyna aınaldy.
Abaı Qalshabek, Dáýren Aımanbet, Súndet Seıitov óz kezeginde oqyrmandarǵa súbeli sózderin arnap, ParaqTimes-tyń joǵary deńgeıde ótýine úles qosty.
«Qyzmet» baspasynan shyqqan Pernebaı Sapar myrzanyń «Óleıin desem aqsham joq», Madına Sabyr hanymnyń «Saıramnan Túrkistanǵa deıin», Saltanat Madııarqyzynyń «Shahmat», Seıdaly Dúısebaıulynyń «Túrkistan ǵajaıyptary» kitaptarynyń tusaýy sheshildi.
Nur-Sultan, Almaty, Qaraǵandy, Shymkent qalalarynyń baspa úıleri, kitap dúkenderi, kitaphanalary oqyrmanmen ashyq dıalog quryp, pikirlesý alańshasynda aqyn-jazýshylarmen jáne jas qalamgerlermen kezdesýler ótkizdi. «Qazaq enıklopedııasy», «Qyzmet», «Otbasy hrestomatııasy», «Shashý», «KHAN COMICS», «Qazbilim», «Shyń» «Shugylakitap» baspa úıleri, «KITAPAL», «Qazyna» kitap dúkenderi men Y.Altynsarın atyndaǵy Túrkistan oblystyq balalar kitaphanasy jáne Farab kitaphanasy kitap álemine oqyrmandarymen birge saıahat jasady.
Aıta keteıik, is-sharanyń negizgi maqsaty - qoǵamnyń ıntellektýaldy áleýeti men mádenı qundylyqtaryn, óskeleń urpaqtyń rýhanı-adamgershilik bilimin arttyrýǵa, jastardyń kitap oqýǵa, kórkem ádebıetke degen qushtarlyǵyn oıatýǵa baǵyttaldy.
"Adyrna" ulttyq portaly
