كوكشەتاۋدا كامەلەت جاسىنا تولماعان بالالار مونشاعا بارعان كەزدە ۋلانىپ قالدى، دەپ حابارلايدى "ادىرنا" ۇلتتىق پورتالى.
- وبلىستىق كوپبەيىندى بالالار اۋرۋحاناسىنا كامەلەت جاسىنا تولماعان ءۇش بالا تۇسكەنى تۋرالى تەلەفون ارقىلى حابارلاما كەلدى. ولار جەتى، توعىز جانە 17 جاستا. دياگنوز – حيميالىق زاتپەن ۋلانۋ، - دەپ حابارلادى اقمولا وبلىسى پوليتسيا دەپارتامەنتىنىڭ ءباسپاسوز قىزمەتىندە.
الدىن الا بولجام بويىنشا، بالالار حلوردان ۋلانعان. ال كوپبەيىندى بالالار اۋرۋحاناسىندا قازىرگى ۋاقىتتا ستاتسيوناردا زارداپ شەككەن بالالاردىڭ اراسىنداعى ەڭ ۇلكەنى ەم الىپ جاتقانىن حابارلادى.
- ءۇش بالا ءتۇستى. جەتى جانە توعىز جاسار ەكى بالانى ۇيىنە جىبەردىك. ولاردى اۋرۋحاناعا جاتقىزۋدىڭ قاجەتى بولعان جوق. 17 جاستاعى ناۋقاستىڭ جاعدايى – ورتاشا اۋىر، - دەدى مەديتسينالىق مەكەمەنىڭ باس دارىگەرىنىڭ ورىنباسارى جانار اۋباكىروۆا.
ايتا كەتەيىك، وسى فاكتى بويىنشا قىلمىستىق كودەكستىڭ 306-بابى 2-بولىگى ("قاۋىپسىزدىك تالاپتارىنا سايكەس كەلمەيتىن جۇمىستاردى ورىنداۋ نەمەسە قىزمەت كورسەتۋ") بويىنشا سوتقا دەيىنگى تەرگەۋ باستالدى. سوت-مەديتسينالىق ساراپتامالار تاعايىندالدى.
"ادىرنا" ۇلتتىق پورتالى
