ەرتەدە ءبىر كەيۋانا بولىپتى. ول اياعى اۋىر ايەلدەردىڭ بوسانۋىنا جاردەمدەسەدى ەكەن. ايەلدەر «قولى جەڭىل» دەپ، ونىڭ الدىنا ءجيى كەلىپتى.
ءبىر كۇنى ءتۇن ورتاسىندا ەسىگىن بىرەۋ قاعادى. كەيۋانا ەسىكتى اشسا، ەشكىم جوق. كەمپىر «قاعىس ەستىگەن شىعارمىن» دەپ، توسەگىنە قايتىپ كەلىپ جاتادى. بىراق وقيعا ءدال وسىلاي ەكى رەت قايتالانادى. ءۇشىنشى رەتتە ەسىك الدىندا تۇرعان اقبوز اتتى كىسىنى كورەدى. ءتۇر-تۇرپاتى بولەك، وزگەشە ەكەن. جاقىن ماڭايدىڭ كىسىلەرىنە ۇقسامايدى.
– ءبىر جاس كەلىنىمىز بوسانا الماي جاتىر، سوعان جاردەم بەرسەڭىز، – دەيدى ول. كەمپىر كەلىسىپ، جولعا شىعادى.
– اپا، كوزىڭىزدى تارس جۇمىڭىز، ءبىز بەلگى بەرگەنشە اشپاڭىز. ايتپەسە، مايىپ بولاسىز، – دەيدى. كەمپىر كوزىن تارس جۇمىپ وتىرادى. جولدا گۇرسىلدەگەن، سالدىرلاعان، وقىس دىبىستار شىعىپ، زارەسىن ۇشىرادى. ءبىر جەرگە جەتكەندە:
– اپا، كوزىڭىزدى اشىڭىز، – دەگەن داۋىس ەستىلەدى. قاراسا، ءبىر ۇيگە كەلىپتى. توردە جاس كەلىنشەك بوسانا الماي قينالىپ جاتىر ەكەن. كەمپىر ونى امان-ەسەن بوساندىرىپ الادى. نارەستەنىڭ كىندىگىن كەسىپ:
– بالانى، شومىلدىراتىن سۋ اكەلىڭدەر، – دەيدى. ءوزىن ەرتىپ اكەلگەن كىسى: «قازىر»، – دەيدى دە، ءبىراز ۋاقىتقا جوعالىپ كەتەدى. سالدەن كەيىن سۋ ەمەس ءبىر شارا ءسۇت اكەلەدى. كەمپىر تۇسىنبەي تاڭعالادى. بالانى شومىلدىرىپ جاتىپ قاراسا، شارا كورشىسىنىڭ ءسۇت قۇياتىن ىدىسىنا ۇقسايدى ەكەن. كەمپىر سەكەم الىپ قالادى. باسقالارعا بىلدىرمەي، ساقيناسىن سۇتكە سالىپ جىبەرەدى. ءبارى بىتكەن سوڭ، ولار بوپەنى شومىلدىرعان ءسۇت پەن توستاقتى قايتادان الىپ كەتەدى.
ءۇي يەلەرى وعان مول سىي-سياپات بەرىپ، ۇيىنە اكەلىپ تاستايدى. كەمپىر تاڭ اتقانشا كوز ىلمەيدى.
ەرتەسىنە تۇندەگى شارانى تەكسەرۋ ءۇشىن كورشى ۇيگە بارادى. تانىس ىدىس كوزىنە وتتاي باسىلادى. ىشىندە ءسۇت تۇر ەكەن. ول ءسۇتتى ءسۇزىپ، ساقيناسىن تاۋىپ الادى. سول كەزدە بارىپ، تۇندەگى بەيتانىس كىسىلەردىڭ جىن-پەرى ەكەنىن تۇسىنەدى. كورشىسىنە بولعان جايدى بايانداپ، سۇتكە جىن بالاسىنىڭ شومىلعانىن ايتادى دا، ءسۇتتى ادام اياعى باسپايتىن جەرگە توكتىرەدى.
كورشى ءۇيدىڭ كەلىنى بۇرىننان سالاق ەدى. ىرىم-تىيىم تالاپتارعا جەڭىل قارايتىن. مايلىقتارى، جاۋلىقتارى ايلاپ-اپتالاپ جۋىلمايتىن. كەشكى استان سوڭ ىدىس-اياعىن جۋعا ەرىنىپ جاتا سالاتىن. ۇيدەگى اس-اۋقاتتىڭ بەتىن بۇركەپ جاتۋعا دا ەرىنەتىن. سول كۇنى تۇندە ءسۇتتىڭ بەتىن جاپپاستان جاتىپ قالىپتى. ونىڭ اشىق-شاشىق ىدىستارىن جىن-جىبىرلار جالاپ كەتەدى ەكەن. سونىڭ كەسىرىنەن ءۇيىنىڭ بەرەكەسى قاشىپ، بايى ەسەلەپ مال تاپسا دا، باقۋاتتى ءومىر سۇرمەيتىن.
وسىعان بايلانىستى ەل ىشىندە تۇنگە قاراي ءسۇت پەن سۋدى، اس-اۋقاتتى اشىق تاستاماۋ، ىدىس-اياقتى جۋىپ جاتۋ تۋرالى ىرىم-تالاپتار كوبەيگەن ەكەن.
دايىنداعان: ماديار مەڭدىباي،
“ادىرنا” ۇلتتىق پورتالى
