Ertede bir keıýana bolypty. Ol aıaǵy aýyr áıelderdiń bosanýyna járdemdesedi eken. Áıelder «qoly jeńil» dep, onyń aldyna jıi kelipti.
Bir kúni tún ortasynda esigin bireý qaǵady. Keıýana esikti ashsa, eshkim joq. Kempir «qaǵys estigen shyǵarmyn» dep, tósegine qaıtyp kelip jatady. Biraq oqıǵa dál osylaı eki ret qaıtalanady. Úshinshi rette esik aldynda turǵan aqboz atty kisini kóredi. Túr-turpaty bólek, ózgeshe eken. Jaqyn mańaıdyń kisilerine uqsamaıdy.
– Bir jas kelinimiz bosana almaı jatyr, soǵan járdem berseńiz, – deıdi ol. Kempir kelisip, jolǵa shyǵady.
– Apa, kózińizdi tars jumyńyz, biz belgi bergenshe ashpańyz. Áıtpese, maıyp bolasyz, – deıdi. Kempir kózin tars jumyp otyrady. Jolda gúrsildegen, saldyrlaǵan, oqys dybystar shyǵyp, záresin ushyrady. Bir jerge jetkende:
– Apa, kózińizdi ashyńyz, – degen daýys estiledi. Qarasa, bir úıge kelipti. Tórde jas kelinshek bosana almaı qınalyp jatyr eken. Kempir ony aman-esen bosandyryp alady. Náresteniń kindigin kesip:
– Balany, shomyldyratyn sý ákelińder, – deıdi. Ózin ertip ákelgen kisi: «Qazir», – deıdi de, biraz ýaqytqa joǵalyp ketedi. Sálden keıin sý emes bir shara sút ákeledi. Kempir túsinbeı tańǵalady. Balany shomyldyryp jatyp qarasa, shara kórshisiniń sút quıatyn ydysyna uqsaıdy eken. Kempir sekem alyp qalady. Basqalarǵa bildirmeı, saqınasyn sútke salyp jiberedi. Bári bitken soń, olar bópeni shomyldyrǵan sút pen tostaqty qaıtadan alyp ketedi.
Úı ıeleri oǵan mol syı-sııapat berip, úıine ákelip tastaıdy. Kempir tań atqansha kóz ilmeıdi.
Ertesine túndegi sharany tekserý úshin kórshi úıge barady. Tanys ydys kózine ottaı basylady. Ishinde sút tur eken. Ol sútti súzip, saqınasyn taýyp alady. Sol kezde baryp, túndegi beıtanys kisilerdiń jyn-peri ekenin túsinedi. Kórshisine bolǵan jaıdy baıandap, sútke jyn balasynyń shomylǵanyn aıtady da, sútti adam aıaǵy baspaıtyn jerge tóktiredi.
Kórshi úıdiń kelini burynnan salaq edi. Yrym-tyıym talaptarǵa jeńil qaraıtyn. Maılyqtary, jaýlyqtary aılap-aptalap jýylmaıtyn. Keshki astan soń ydys-aıaǵyn jýýǵa erinip jata salatyn. Úıdegi as-aýqattyń betin búrkep jatýǵa da erinetin. Sol kúni túnde súttiń betin jappastan jatyp qalypty. Onyń ashyq-shashyq ydystaryn jyn-jybyrlar jalap ketedi eken. Sonyń kesirinen úıiniń berekesi qashyp, baıy eselep mal tapsa da, baqýatty ómir súrmeıtin.
Osyǵan baılanysty el ishinde túnge qaraı sút pen sýdy, as-aýqatty ashyq tastamaý, ydys-aıaqty jýyp jatý týraly yrym-talaptar kóbeıgen eken.
Daıyndaǵan: Madııar MEŃDIBAI,
“Adyrna” ulttyq portaly
