"تاليبان" قوزعالىسىنىڭ وكىلدەرى رەسەي پرەزيدەنتى ۆلاديمير ءپۋتيننىڭ مالىمدەمەسىنە تۇسىنىكتەمە بەردى، ول اۋعانستاننىڭ سولتۇستىگىندە "يسلام مەملەكەتى" (دايش، يگ) سودىرلارىنىڭ بولۋىنا الاڭداۋشىلىق ءبىلدىردى، دەپ حابارلايدى "ادىرنا" ۇلتتىق پورتالى.
15 قازان، جۇما كۇنى پۋتين تمد مەملەكەت باسشىلارى كەڭەسىنىڭ وتىرىسىندا اۋعانستاننىڭ سولتۇستىگىندە 2000-عا جۋىق دايش سودىرلارىنىڭ شوعىرلانعانىن ايتتى.
- ولاردىڭ كوشباسشىلارى ورتالىق ازيا مەملەكەتتەرىنە، رەسەي ايماقتارىنا ىقپال ەتۋدى جوسپارلاپ وتىر. ولار ەتنوكونفەسسيالىق قاقتىعىستار مەن ءدىني ارازدىقتى قوزدىرۋعا ستاۆكا قويادى. تەرروريستەر دوستاستىق اۋماعىنا بوسقىن كەيپىندەكىرۋگە تىرىسادى، - دەدى رەسەي پرەزيدەنتى.
پۋتين سونداي-اق تاليباندى رەسمي مويىنداۋعا اسىقپاۋعا شاقىردى.
- ءبىز ازىرگە تاليباندى رەسمي مويىنداۋعا اسىقپاۋىمىز كەرەك. ءبىز ولارمەن قارىم-قاتىناس جاساۋىمىز كەرەك ەكەنىن تۇسىنەمىز، بىراق ءبىز بۇعان اسىقپاۋىمىز كەرەك. ءبىز مۇنى تالقىلاپ، كەڭەس بەرەمىز. الايدا، ءبىز اۋعانستانداعى تاتۋلاسۋ پروتسەسىن قولداپ، سول ەلدەگى جاعدايدى قالىپقا كەلتىرۋگە ۇمتىلۋىمىز كەرەك، - دەيدى پۋتين.
"تاليبان" مادەنيەت كوميسسياسىنىڭ مۇشەسى انامۋللا سامانگاني اۋعانستاننىڭ سولتۇستىگىندە دايش سودىرلارىنىڭ بولۋى تۋرالى حابارلامالار شىندىققا جاناسپايتىنىن ايتتى.
- وسىعان بايلانىستى ايتىلعان قورقىنىش نەگىزسىز. دايش اۋعانستاننىڭ كەز كەلگەن بولىگىندە حالىقتىڭ قولداۋىنا يە ەمەس، - دەدى سامانگاني.
ءوز كەزەگىندە "تاليبان" تاعايىنداعان ۇكىمەتتەگى سىرتقى ىستەر ءمينيسترىنىڭ مىندەتىن اتقارۋشى امير حان مۋتتاكي تاليبان ۇكىمەتىنىڭ حالىقارالىق قوعامداستىقتىڭ مويىنداماۋى دايش سودىرلارىنىڭ قولىندا ەكەنىن ايتتى.
- اۋعانستانداعى جاڭا مەملەكەتتىڭ رەسمي تۇردە تانىلماۋى يگ ءۇشىن ءتيىمدى. ءبىر جاعىنان، شەت ەلدەر بىزگە اۋعاندىقتاردى ەلدەن كەتپەۋ ءۇشىن باقىلاۋدا ۇستاۋ كەرەكتىگىن ايتادى. ەكىنشى جاعىنان، ولار جاڭا ۇكىمەتتى مويىندامايدى، سايكەسىنشە بۇل يگ تەرروريستەرىنىڭ جاۋىنگەرلىك رۋحىن كوتەرەدى. بۇل اۋعانستاننىڭ دا، الەمنىڭ دە مۇددەلەرىنە سايكەس كەلمەيدى، - دەدى مۋتتاكي Anadolu-عا بەرگەن سۇحباتىندا.
ونىڭ ايتۋىنشا، الەمدە بيلىكتى كۇشپەن نەمەسە توڭكەرىسپەن باسىپ العان مەملەكەتتەر بار، بىراق ولار مويىندالعان، ال اۋعانستان ۇكىمەتى "دە فاكتو"بيلىك مارتەبەسىنە يە.
"ادىرنا" ۇلتتىق پورتالى
