اقش -تىڭ حالىقارالىق ءدىني بوستاندىق جونىندەگى كوميسسياسى جاڭا ەسەپتى جاريالادى، وندا وزبەكستان ءدىني سەنىمى ءۇشىن 2 مىڭ ادامدى تۇرمەگە قاماعانى ايتىلعان دەپ حابارلايدى "ادىرنا" ۇلتتىق پورتالى "centralasia.media" سايتىنا سىلتەمە جاساپ.
باياندامادا وزبەكستان تۇرمەلەرىندە 2000 -نان استام ءدىني تۇتقىن ۇستالعانى، ولاردىڭ 81-ءىنىڭ كىم ەكەندىگى ايتىلعان.
باياندامانىڭ اۆتورى، كونگرەستىڭ ورتالىق ازياداعى ادام قۇقىقتارى جونىندەگى بايانداماشىسى ستيۆ سۆەردلوۆ 81 دىنگە سەنۋشىنىڭ كوپشىلىگىنىڭ ازاپتالعانىن نەمەسە باسقالاي قورلانعانىن ايتتى. اقش-تىڭ ءدىني بوستاندىق جونىندەگى كوميسسياسىنىڭ بايانداماسى "وزبەكستاننىڭ ءدىني جانە ساياسي تۇتقىندارى: رەپرەسسيا پراكتيكاسىن جويۋ" دەپ اتالادى.
وندا ەلدە بەيبىت ناماز ءۇشىن قامالعان ءدىني تۇتقىنداردىڭ ناقتى سانى بۇرىننان جۋرناليستەرگە، قۇقىق قورعاۋشىلارعا، اقش ۇكىمەتىنە، ەۋروپالىق وداق پەن بۇۇ -عا بەلگىسىز ەكەنى ايتىلادى.
وزبەكستان ۇكىمەتى مۇنداي تۇتقىنداردىڭ سانى مەن جەكە باسى تۋرالى اقپاراتتاردى ەشقاشان ايتپاعان.
ەسەپ اۆتورى ستيۆ سۆەردلوۆ وزبەكستان بۇرىنعى كەڭەس وداعىنداعى ءدىندار تۇتقىندارى ەڭ كوپ ەلگە اينالعانىن جەتكىزدى: "2000 -نان استام دىنگە سەنۋشى تەمىر توردىڭ ارتىندا", - دەدى ول.
بايانداما اۆتورى وسى سوتتالۋشىلارعا تاعىلعان ايىپقا نازار اۋدارادى. بۇل سوتتالعانداردىڭ كوبىنە "ەلدىڭ كونستيتۋتسيالىق قۇرىلىسىن قۇلاتۋ", "تىيىم سالىنعان ادەبيەتتەردى ساقتاۋ نەمەسە تاراتۋ" جانە "تىيىم سالىنعان ءدىني توپتارعا مۇشەلىك" سياقتى قىلمىستار بويىنشا ايىپ تاعىلعان.
ەڭ باستىسى، باياندامادا انىقتالعان 81 ءدىني تۇتقىنعا قاتىستى مۇنداي ايىپتاۋدى راستايتىن ناقتى دالەل جوق.
ستيۆ سۆەردلوۆتىڭ ايتۋىنشا، وزبەكستاننىڭ قىلمىستىق كودەكسىندە وسىنداي سوتتالعان ادامدارعا بەرىلگەن كوپتەگەن باپتار بار، ولاردىڭ كوپشىلىگى وزبەكستاننىڭ حالىقارالىق قۇقىقتىق مىندەتتەمەلەرىنە قايشى كەلەدى.
"وزبەكستاننىڭ قىلمىستىق كودەكسى كاريموۆ كەزىندە بولعان كۇيىندە قالىپ وتىر. سوندىقتان ماسەلە ءالى دە بار", - دەدى بايانداما اۆتورى.
"ادىرنا" ۇلتتىق پورتالى.
