قورعانىس مينيسترلىگى قازىر جامبىل وبلىسىنىڭ بايزاق اۋدانىندا جوسپارلى تۇردە باقىلاناتىن جارىلىستار بولىپ جاتقانىن حابارلادى. وق-دارىلەردى تاۋعا جەتكىزىپ، وندا باقىلاناتىن جارىلىستار جۇرگىزىلەدى.
بۇگىن 11.00, 12.00 جانە 16.00-دە جارىلىستار ۇيىمداستىرىلادى. جوسپار بويىنشا 12 قازان مەن 13 قاراشا ارالىعىندا جۇمىس كۇندەرى ساعات 9.00-دەن 18.00-گە دەيىن اسكەريلەر جارىلعىش زاتتاردى جويۋدى ىسكە اسىرادى.
قورعانىس مينيسترلىگى اتالمىش ماسەلە بويىنشا رەسمي حابارلاما جاسادى. "وق-دارىلەر فراگمەنتتەرىن جارۋ بويىنشا جۇمىستار باستالدى. بۇدان بۇرىن حابارلانعانداي، قازاقستان رەسپۋبليكاسى قورعانىس مينيسترلىگى ينجەنەرلىك-ساپەرلىك بولىمشەلەرىنىڭ كۇشىمەن جامبىل وبلىسىنىڭ بايزاق اۋدانىندا وق-دارىلەر فراگمەنتتەرىن باقىلاپ جارۋ باستالدى. جۇمىس كۇن سايىن دۇيسەنبىدەن باستاپ جۇما ارالىعىندا اعىمداعى جىلعى 13 قاراشاعا دەيىن جۇرگىزىلەدى. بۇل ءۇشىن ادامدار جوق تاۋلى جەردە اسكەري ءبولىم مەن ەلدى مەكەندەردەن الىستا اسكەري بولىمنەن 12 شاقىرىمنان استام قاشىقتىقتا ۋچاسكە بەلگىلەندى. ماماندار توبى جەرگىلىكتى حالىق پەن ينجەنەرلىك-ساپەرلىك بولىمشەلەر جەكە قۇرامىنىڭ قاۋىپسىزدىگىن قامتاماسىز ەتۋ ءۇشىن تاڭدالعان جەر ۋچاسكەسىن تولىعىمەن زەردەلەدى. جەرگىلىكتى اتقارۋشى ورگاندارى مەن جەرگىلىكتى حالىققا جارۋ جۇمىستارىنىڭ جۇرگىزىلۋى تۋرالى الدان الا حابارلاندى. جامبىل وبلىسى ىشكى ىستەر دەپارتامەنتىنىڭ قىزمەتكەرلەرىن تارتا وتىرىپ، اسكەري پوليتسيا كۇشىمەن جارۋ ورنىنىڭ اينالاسىنداعى اۋماق قورشالدى. جارۋ كەزىندە دىبىستىق اسەر بولادى. جۇرگىزىلەتىن جۇمىستىڭ جەرگىلىكتى حالىق ءۇشىن قاۋپى جوق" دەدى مينيسترلىك.
"ادىرنا" ۇلتتىق پورتالى
