«ەل ءۇشىن ەگىلەمىن» ازاماتتىق شتابى الماتى وبلىسىنا جۇمىس ساپارىمەن كەلدى

1965
Adyrna.kz Telegram

جاھاندى جايلاعان پاندەميا جۇمىر باستى پەندەنى الەككە سالعانى انىق. ىندەت بىردەن لاپ قويعاندا كەسەلدىڭ تۇزاعىنان ەشكىمدە قۇتىلا الماسىن ءبىلدى. العاشىندا ەل مەديتسيناسى كورىنبەس جاۋدى اۋىزدىقتاۋدىڭ امالىن تاپپاعانى راس. كەيىننەن، اق حالاتتىلار تىعىرىقتان شىعۋدىڭ بىرقاتار جولدارىن قاراستىردى. ەل اراسىندا «ءتازدى تاجال» دەپ اتالعان بۇل اۋرۋدان ارىلۋدىڭ جالعىز جولى- ەكپە. العاش بولىپ، رەسسەيلىك «سپۋتنيك V» ۆاكتسيناسى قولدانىسقا ەندى. ءبىرى ەكپەنىڭ تيىمدىلىگىنە سەندى، ەندى ءبىرى ونىڭ پايداسىنا كوز جەتكىزبەدىك دەستى.

رەسپۋبليكا بويىنشا قۇرىلعان «ەل ءۇشىن ەگىلەمىن» ازاماتتىق شتابىنىڭ ماقساتى پاندەميامەن كۇرەس جولىنداعى ءتيىمدى شارا دەپ تانىلعان ۆاكتسيناتسيالاۋ جۇمىسىنىڭ قارقىن الۋىنا ىقپال ەتۋ.
ىندەتتىڭ ىلمەگىنە ەلىم ىلىنبەسىن دەگەن شتاب وكىلدەرى الماتى وبلىسىنا تابان تىرەدى. ماقسات بىرەۋ- ايماقتاعى ەپيداحۋالدى باعامداۋ، اتقارىلار ىلكىمدى ىستەردىڭ كوشىن جولعا قويۋ.

«2021 جىلدىڭ 3 تامىزدا قازاقستاندا كوروناۆيرۋس پاندەمياسىمەن كۇرەس جونىندەگى «ەل ءۇشىن ەگىلەمىن» تاۋەلسىز بەلسەندىلەر بىرلەستىگى-ازاماتتىق شتاب قۇرىلدى. ازاماتتىق شتابتىڭ مىندەتى-COVID-19 ۆاكتسيناتسياسى تۋرالى وبەكتيۆتى اقپاراتتىڭ ماكسيمالدى مولشەرىن ۇسىنۋ جانە ازاماتتاردى ۆاكتسيناتسياعا كوندىرۋ. ەكپەگە قارسى جالعان اقپاراتتىڭ تارالۋىنىڭ الدىن الۋ. ءبىز تەكسەرۋ ءۇشىن كەلگەن جوقپىز. تەك ەلىمىزدىڭ پاندەميانى تەزارادا جەڭۋىنە قولقابىس ەتۋدى كوزدەپ كەلدىك»،-دەدى سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى-قر پرەمەر-ءمينيسترى ورىنباسارىنىڭ ءباسپاسوز حاتشىسى ەرجان بايتاناەۆ.

وبلىس ورتالىعانا كەلگەن شتاب وكىلدەرى ەڭ اۋەلى، ايماقتاعى كوپسالالى اۋرۋحانا دارىگەرلەرىمەن كەزدەستى. مۇندا، اق حالاتتىلاردىڭ پىكىرىن تىڭداپ، پاندەميامەن كۇرەستەگى الدىڭعى قاتارلى جوسپارلى ىستەردىڭ ورىندالۋىمەن تانىستى.

ارتىنشا، «سيتي پليۋس» ويىن-ساۋىق ورتالىعىنداعى جىلجىمالى ەگۋ پۋنكتىنە باس سۇقتى. شاھارداعى ادام اياعى ۇزىلمەيتىن ورتالىقتاعى ەكپە جۇمىستارىنىڭ ءجۇرۋ بارىسىن كوزدەرىمەن كوردى.
ايتا كەتەيىك، ساۋدا ورىنىنداعى ەگۋ پۋنكتىنە جۇمىس كۇندەرى 50-60 ادام كەلسە، دەمالىستا 120-150 تۇرعىن ەكپە الادى. مۇنداعى دارىگەر، جىلجىمالى ەكپە پۋنكتىنە كەلۋشى جۇرت «سينوفارم» ۆاكتسيناسىنا سۇرانىستىڭ جوعارى ەكەنىن ايتادى. ويتكەنى، اتالعان ەكپە ەكى دوزاعا لايىقتالعان.
شتاب بەلسەندىلەرى ەلىمىزدە ۆاكتسيناتسيا قارقىنىنىڭ تومەندەگەنىن اتاپ ءوتتى. ماسەلەن، ەگەر شىلدە ايىنىڭ ورتاسىندا تاۋلىگىنە 130 مىڭعا دەيىن ادام ۆاكتسينا السا، قازىر نەبارى 30 مىڭ قازاقستاندىق يممۋندالۋدا. الماتى وبلىسىندا ۆاكتسيناتسيا قارقىنى جالپى رەسپۋبليكالىق ەكپەلەردەن ءبىرشاما ارتتا قالىپ وتىر. سوڭعى ايدا وبلىستا ءبىرىنشى كومپونەنتپەن ۆاكتسيناتسيالاۋ 6% - عا (64% - دان 70% - عا دەيىن) ءوستى، ال جالپى رەسپۋبليكالىق كورسەتكىش 8,5% - عا ارتتى جانە 79% جەتتى. اتالعان كورسەتكىش بويىنشا وبلىس بارلىق وڭىرلەر اراسىندا 9-شى ورىندا.

شتاب وكىلدەرى، وبلىستاعى جەتەكشى اقپاراتتىق الاڭ «Jetisy Media-عا» كەلىپ، ءباسپاسوز-ءماسليحاتىندا باق وكىلدەرىمەن كەزدەسىپ، كوكەي كەستى ساۋالدارعا جاۋاپ بەردى. سونداي-اق، ولار وڭىرىمىزدەگى ۆاكتسيناتسيا جۇمىستارىنا توقتالىپ ءوتتى.

نەگىزىنەن، جىل باسىنان الماتى وبلىسىنا ۆاكتسينانىڭ ءى-كومپونەنتىنەن 839685 دوزاسى، ءىى-كومپونەنت 829815 دوزاسى كەلىپ ءتۇستى. بۇگىنگى كۇنگە دەيىن كوروناۆيرۋس ينفەكتسياسىنا قارسى ءى كومپونەنتپەن 772077 ادام، ءىى كومپونەنتپەن 688291 تۇرعىن ەگىلدى.

وبلىس بويىنشا جوسپاردان ءى ەكپەمەن قامتىلۋى 64%. وبلىستىق كورسەتكىشتەن تومەن قامتىعان اۋداندار مەن قالالار: تالعار (47%), پانفيلوۆ (53%), قاراتال (55%), تالدىقورعان (57%), ۇيعىر (58%), ەڭبەكشىقازاق (61%), ەسكەلدى (63%). ەستەرىڭزگە سالامىز، جوسپارعا سايكەس وڭىردە 1,2 ملن. ازامات ەكپە الۋى ءتيىس.

"ادىرنا" ۇلتتىق پورتالى

پىكىرلەر