مۇندا قالا تۇرعىندارىنىڭ وتباسىلىق قۇندى جادىگەرلەرى قويىلعان
قر تاۋەلسىزدىگىنىڭ 30 جىلدىعى اياسىندا قوستاناي وبلىستىق تاريحي-ولكەتانۋ مۋزەيى «وتباسى كۇنىنە» وراي ۇرپاقتان-ۇرپاققا جالعاسىن تاپقان ەستەلىك زاتتاردان «باعا جەتپەس جادىگەرلەر» دەپ اتالعان كورمە ۇيىمداستىردى.
مۋزەيگە وتباسىلىق جادىگەرلەرىن ۋاقىتشا سىيعا تارتقان قوستانايلىقتاردىڭ سول زاتتارعا قاتىستى وقيعالارى مەن ەستەلىكتەرى ءاربىر وتباسىنىڭ تاريحى ەلدىڭ تاريحي جادىنىڭ ماڭىزدى جانە اجىراماس بولىگى ەكەنىن ايقىنىراق تۇسىنۋگە كومەكتەسەدى.
كورمەگە مۋزەي قىزمەتكەرلەرى مەن قالا تۇرعىندارى اجەلەرىنىڭ كوزى رەتىندە ساقتاپ جۇرگەن كۇمىس اشەكەيلەرىن، اتالارىنا مۇرا بولىپ قالعان ءدۇربى، قالتا ساعات، فوتواپپاراتتارىن، بوزبالا مەن بويجەتكەننىڭ وسىدان 70 جىل بۇرىنعى ءبىر-بىرىنە جازعان جان تەبىرەنتەرلىك حاتتارىن، 1955 جىلدارى كۇيەۋبالا مەن قالىڭدىققا سىيعا تارتىلعان ستاقاندار (بوكالدار), ەرتە كەزدەگى بالالاردىڭ ويىنشىقتارى سىندى ءاربىر وتباسى ءۇشىن قۇندى دۇنيەلەر كورمەگە قويىلعان.
-كەز-كەلگەن وتباسىنىڭ ءوزىنىڭ ەرەكشە قۇندى دۇنيەلەرى بولادى. ومىردەن وتكەن اتا-اجەسىنىڭ ۇرپاقتارىنا امانات ەتكەن قۇندى زاتتارى دا باعا جەتپەس دۇنيە. بۇل ءبىرىنشى كەزەكتە وتباسىنىڭ ماڭىزدىلىعىن كورسەتەدى. ءبىر شاڭىراق استىندا عۇمىر كەشىپ جاتقان ءبىر-بىرىنە باۋىر بولىپ كەلەتىن جاندار ءاردايىم ءوزىنىڭ قۇندى زاتىن ءبىر-بىرىنە سىيعا تارتىپ وتىرادى. وسى زاتتار ارقىلى ارقايسىسى ءوز ءومىر جولىن تاڭداپ، ارالارى الشاقتاعان كەزدەرى ولاردىڭ ساعىنىشىن باساتىن قۇندى دۇنيەلەرىنە اينالادى.
مىنە، ءبىز «وتباسى كۇنى» مەرەكەسىنە وراي، وسىنداي قۇندى دۇنيەلەردەن كورمە ۇيىمداستىرۋدى قولعا العان بولاتىنبىز. مۇندا قويىلعان جادىگەرلەردىڭ ءبارى ەرتەدەن ءبىر جانۇيانىڭ قىمبات تا قۇندى دۇنيەسىنە اينالعان زاتتار. ولاردىڭ ارقايسىسىنىڭ وزىندىك تاريحى بار. باستى ماقسات وتباسى قۇندىلىعىن جوعالتپاي، ۇرپاقتان ۇرپاققا مۇرا بولىپ قالاتىن دۇنيەلەردىڭ قانشالىقتى قىمبات ەكەنىن كورسەتۋ بولدى، – دەيدى مۋزەي قىزمەتكەرى ايبيكە قازىباەۆا.
مۋزەيدەگى بۇل كورمە 1 اپتا بويى جۇمىس ىستەيدى. وسى ۋاقىت ىشىندە قالا تۇرعىندارىنا مۋزەيگە كەلىپ وتباسىلىق قۇندىلىقتارمەن تانىسۋعا زور مۇمكىندىك بار.
اياگوز كاكىمجانوۆا
