Munda qala turǵyndarynyń otbasylyq qundy jádigerleri qoıylǵan
QR Táýelsizdiginiń 30 jyldyǵy aıasynda Qostanaı oblystyq Tarıhı-ólketaný mýzeıi «Otbasy kúnine» oraı urpaqtan-urpaqqa jalǵasyn tapqan estelik zattardan «Baǵa jetpes jádigerler» dep atalǵan kórme uıymdastyrdy.
Mýzeıge otbasylyq jádigerlerin ýaqytsha syıǴa tartqan qostanaılyqtardyń sol zattarǵa qatysty oqıǵalary men estelikteri árbir otbasynyń tarıhy eldiń tarıhı jadynyń mańyzdy jáne ajyramas bóligi ekenin aıqynyraq túsinýge kómektesedi.
Kórmege mýzeı qyzmetkerleri men qala turǵyndary ájeleriniń kózi retinde saqtap júrgen kúmis áshekeılerin, atalaryna mura bolyp qalǵan dúrbi, qalta saǵat, fotoapparattaryn, bozbala men boıjetkenniń osydan 70 jyl burynǵy bir-birine jazǵan jan tebirenTerlik hattaryn, 1955 jyldary kúıeýbala men qalyńdyqqa syıǵa tartylǵan staqandar (bokaldar), erte kezdegi balalardyń oıynshyqtary syndy árbir otbasy úshin qundy dúnıeler kórmege qoıylǵan.
-Kez-kelgen otbasynyń óziniń erekshe qundy dúnıeleri bolady. Ómirden ótken ata-ájesiniń urpaqtaryna amanat etken qundy zattary da baǵa jetpes dúnıe. Bul birinshi kezekte otbasynyń mańyzdylyǵyn kórsetedi. Bir shańyraq astynda ǵumyr keship jatqan bir-birine baýyr bolyp keletin jandar árdaıym óziniń qundy zatyn bir-birine syıǵa tartyp otyrady. Osy zattar arqyly árqaısysy óz ómir jolyn tańdap, aralary alshaqtaǵan kezderi olardyń saǵynyshyn basatyn qundy dúnıelerine aınalady.
Mine, biz «Otbasy kúni» merekesine oraı, osyndaı qundy dúnıelerden kórme uıymdastyrýdy qolǵa alǵan bolatynbyz. Munda qoıylǵan jádigerlerdiń bári erteden bir januıanyń qymbat ta qundy dúnıesine aınalǵan zattar. Olardyń árqaısysynyń ózindik tarıhy bar. Basty maqsat otbasy qundylyǵyn joǵaltpaı, urpaqtan urpaqqa mura bolyp qalatyn dúnıelerdiń qanshalyqty qymbat ekenin kórsetý boldy, – deıdi mýzeı qyzmetkeri Aıbıke Qazybaeva.
Mýzeıdegi bul kórme 1 apta boıy jumys isteıdi. Osy ýaqyt ishinde qala turǵyndaryna mýzeıge kelip otbasylyq qundylyqtarmen tanysýǵa zor múmkindik bar.
Aıagóz KÁKIMJANOVA
