بۇگىن — مۇعالىمدەر كۇنى. الاشتىڭ اقىنى ماعجان جۇماباەۆتىڭ «التى الاشتىڭ باسى ءبىر جەرگە قوسىلسا، توردەگى ورىن — ۇستازدىكى» دەگەن ءبىر اۋىز ءسوزى وسىناۋ ماماندىق يەلەرىنىڭ قوعامداعى ورنىن ايشىقتاپ تۇرعانداي. جاس ۇرپاقتىڭ بويىنا بىلىممەن قوسا ىزگىلىك ءنارىن سەبەتىن مۇعالىمدەر قاۋىمى ءۇشىن بۇل مەرەكەنىڭ ماڭىزى زور.
مۇعالىمدەر كۇنى 1994 جىلدان بەرى دۇنيە ءجۇزىنىڭ 100-دەن استام مەملەكەتىندە قازان ايىنىڭ العاشقى جەكسەنبىسىندە اتاپ وتىلەدى. ال بىرقاتار ەلدەردە بۇل مەرەكە 5 قازان كۇنى تويلانادى. ءبىزدىڭ مەملەكەتىمىزدە دە بۇل مەرەكەنى قازان ايىنىڭ العاشقى جەكسەنبىسى دەپ بەلگىلەنگەن.
دالىرەك ايتساق، مۇعالىمدەر كۇنى 1965 جىلى 29 قىركۇيەكتە كسرو جوعارعى كەڭەسى پرەزيدۋمىنىڭ بۇيرىعىمەن قازان ايىنىڭ العاشقى جەكسەنبىسىنە قويىلعان. سونداي-اق 1966 جىلى 5 قازاندا يۋنەسكو مەن حالىقارالىق ەڭبەك ۇيىمىنىڭ وكىلدەرى "مۇعالىمدەردىڭ مارتەبەسىنە قاتىستى ۇسىنىستار" قۇجاتىنا قول قويعان.
قازاقستاندىق ۇستازدار بۇل مەرەكەنى مىندەتتى تۇردە پەداگوگيكالىق ۇجىممەن بىرگە اتاپ وتەدى. سونداي-اق، بۇل كۇنى ۇزدىك ۇستازدار مەرەكەلىك ءىس-شارالاردا ماراپاتتالادى.
سوڭعى وزگەرىستەرگە سايكەس، ۇستازدار بىرنەشە عانا قۇجات تولتىرۋعا مىندەتتەلدى. ولاردان ارتىق ەشقانداي قۇجات سۇرالماۋى ءتيىس. سونداي-اق الداعى 3 جىلدا مۇعالىمدەردىڭ جالاقىسى ءار جىلى 25 پايىزعا ارتاتىن بولدى.
مەملەكەت باسشىسى قاسىم-جومارت توقاەۆ ءوز جولداۋىندا پەداگوگتەردىڭ جالاقىسىن ارتتىرۋدى تاپسىرعان. ونىڭ اياسىندا بىلتىر 1 قاڭتاردان باستاپ مۇعالىمدەردىڭ جالاقىسى 25 پايىزعا ءوستى. بۇل باسى عانا، ويتكەنى، الداعى 3 جىلدا ولاردىڭ جالاقىسى ءار جىلى 25 پايىزعا ارتىپ وتىرۋى ءتيىس.
2019 جىلى 27 جەلتوقساندا مەملەكەت باسشىسى قاسىم-جومارت توقاەۆ «پەداگوگ مارتەبەسى تۋرالى» زاڭعا قول قويدى.«پەداگوگ مارتەبەسى تۋرالى» قر زاڭى 21 باپتان تۇرادى جانە ەلىمىزدەگى 500 مىڭنان استام پەداگوگتىڭ مۇددەلەرىن قورعاۋدى كوزدەيدى. زاڭ نورمالارى مەكتەپكە دەيىنگى، ورتا، كاسىپتىك جانە تەحنيكالىق ءبىلىم بەرۋ، قوسىمشا ءبىلىم بەرۋ، مامانداندىرىلعان، ارنايى ءبىلىم بەرۋ ۇيىمدارىنىڭ، ادىستەمەلىك كابينەتتەردىڭ پەداگوگتەرىنە قاتىستى تالاپتاردى قامتيدى.
قۇجاتتا قامتىلعان پەداگوگتىڭ قۇقىقتارىن كەڭەيتۋ نورمالارى ولاردىڭ جەكە تۇلعالىق دامۋىنا جانە وقۋ ۇدەرىسىن جەتىلدىرۋىنە ىقپال ەتەدى. سونداي-اق پەداگوگتەردى قىزمەتىنە جاتپايتىن جۇمىسقا تارتۋ، شامادان تىس ەسەپتىلىك، نەگىزسىز تەكسەرۋلەر جۇرگىزۋگە تىيىم سالۋ ارقىلى ولاردىڭ جۇكتەمەسىن ازايتۋ وزەكتى ماسەلە. وسىعان بايلانىستى ناقتى سانكتسيالار كوزدەلگەن. «پەداگوگ مارتەبەسى تۋرالى» زاڭدى ىسكە اسىرۋ ءۇشىن رەسپۋبليكالىق بيۋدجەتتەن 2020-2022 جىلدارعا قوسىمشا 2 ترلن. 282 ملرد. تەڭگە (2020 جىلى – 404 ملرد. تەڭگە، 2021 جىلى – 770 ملرد. تەڭگە، 2022 جىلى –1 ترلن. 108 ملرد. تەڭگە) ءبولىندى.
"ادىرنا" ۇلتتىق پورتالى ەلىمىزدەگى بارلىق ۇستازداردى كاسىبي مەرەكەلەرىمەن قۇتتىقتايدى. بارشا ۇستازداردىڭ دەنىنە ساۋلىق، شىعارماشىلىق تابىستار جانە زەرەك، دارىندى شاكىرتتەرىنىڭ كوپ بولۋىن تىلەيمىز.
"ادىرنا" ۇلتتىق پورتالى.
