تۇركىمەنستان پرەزيدەنتى گۋربانگۋلى بەردىمۇحامەدوۆتىڭ رەجيمىن سىنايتىن شەتەلدە تۇراتىن تۇرىكمەن بەلسەندىلەرى اقش پەن ەۋروپانىڭ قالالارىندا شەرۋلەر وتكىزۋدە. نارازىلىق بىلدىرۋشىلەر قوعام مەن حالىقارالىق ۇيىمداردىڭ نازارىن الەۋمەتتىك-ەكونوميكالىق قيىندىقتار مەن ساياسي قىسىمعا تاپ بولعان تۇركىمەنستان تۇرعىندارىنىڭ ماسەلەلەرىنە اۋدارۋعا تىرىسۋدا.
28 قىركۇيەكتە نيۋ-يوركتەگى بىرىككەن ۇلتتار ۇيىمىنىڭ شتاب-پاتەرىنىڭ الدىندا ءبىر توپ تۇركىمەن ازاماتى كەلىپ، نارازىلىق اكتسياسىن جاسادى. اكتسيا 29 قىركۇيەكتە بۇۇ-نىڭ جەنەۆاداعى كەڭسەسىنىڭ الدىندا جالعاستى. ولار قولىنا "ديكتاتور كەت", "تۇركىمەن حالقىنا بوستاندىق" دەگەن جازۋى بار پلاكاتتار ۇستاعان.
تۇركىمەن بەلسەندىلەرى تۇركىمەنستاندا ادام قۇقىعىن ورەسكەل بۇزۋ، ساياسي قايراتكەرلەردى قۋدالاۋ مەن ءولتىرۋ، قىسىم جاساۋدىڭ ارتقانىن ايتۋدا. سونىمەن قاتار كوروناۆيرۋستىق شەكتەۋلەر ەلدىڭ الەۋمەتتىك جاعدايىن ناشارلاتىپ جىبەرگەنىن دە تىلگە تيەك ەتۋدە. رەسمي مالىمەت بويىنشا تۇركىمەنستاندا كوروناۆيرۋس جوق، ال بەيرەسمي دەرەكتەر بويىنشا ورتالىق ازيادا ۆيرۋستان كوز جۇمۋشىلار بويىنشا تۇركىمەنستان كوش باستاۋدا.
"ادىرنا" ۇلتتىق پورتالى
