اۋعانستاننىڭ ءۇش ازاماتى قازاقستان شەكاراسىنان زاڭسىز وتپەك بولعان

2851
Adyrna.kz Telegram

تۇركىستان پوليتسەيلەرى شەتەلدىكتەردى زاڭسىز تاسىمالداعان كۇدىكتىلەردى ۇستادى. بۇل تۋرالى وبلىستىق پد جازدى، دەپ حابارلايدى «ادىرنا» ءتىلشىسى.

سارىاعاش اپب كوشى-قون قىزمەتىنىڭ قىزمەتكەرلەرى جەدەل-ىزدەستىرۋ ءىس-شارالارى بارىسىندا زاڭسىز كوشى-قون ارناسىن ۇيىمداستىرعان ەكى كۇدىكتىنى، ياعني 3 شەتەلدىكتىڭ شەكارادان زاڭسىز وتۋىنە كومەكتەسكەن قازاقستان رەسپۋبليكاسىنىڭ تۇرعىندارىن ۇستادى.

«بەلگىلى بولعانداي، ولار وزبەكستان رەسپۋبليكاسىنان قازاقستان رەسپۋبليكاسىنا شەكارانى كەسىپ وتۋگە تىرىسقان اۋعانستان ازاماتتارى بولىپ شىقتى. قۇقىق بۇزۋشىلار اۋداندىق پوليتسيا بولىمىنە ودان ءارى تەكسەرۋ ءۇشىن جەتكىزىلدى»،– دەلىنگەن حابارلامادا.

قازىرگى ۋاقىتتا شەتەل ازاماتتارىنىڭ شەكارادان زاڭسىز ءوتۋ جايتى بويىنشا قر قك-ءنىڭ 392-بابى "قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز كەسىپ ءوتۋ" بويىنشا سوتقا دەيىنگى تەرگەۋ جۇرگىزىلۋدە، ال ەكى جەرگىلىكتى تۇرعىنعا قاتىستى قر قك-ءنىڭ 394-بابى "زاڭسىز كوشى-قوندى ۇيىمداستىرۋ" بويىنشا قىلمىستىق ءىس قوزعالدى.

تەرگەۋ وقيعانىڭ بارلىق ءمان-جايىن جانە كۇدىكتىلەردىڭ باسقا دا قىلمىستارعا قاتىستىلىعىن انىقتايدى.

«ادىرنا» ۇلتتىق پورتالى

پىكىرلەر