ۆاكتسينالاۋ ناۋقانى باستالعاننان بەرى قازاقستاندا ۆاكتسينانىڭ ەكى كومپونەنتىن العان 482 ادام كوروناۆيرۋستان قايتىس بولدى. بۇل تۋرالى دەنساۋلىق ساقتاۋ ءمينيسترى الەكسەي تسوي ونلاين بريفينگتە مالىمدەدى، دەپ حابارلايدى "ادىرنا" ۇلتتىق پورتالى.
1 اقپاننان بەرى كوروناۆيرۋسقا قارسى ۆاكتسينا العان 482 ادام ىندەتتەن كوز جۇمدى.
- ءبىرىنشى اقپاننان تامىزدىڭ سوڭىنا دەيىنگى جاعداي ۆاكتسينا العان 482 ادام قايتىس بولدى. بۇل كوروناۆيرۋستان كوز جۇمعاندار سانىنىڭ شامامەن 5%-ىن قۇرايدى، - دەدى تسوي ۇكىمەت ۇيىندە وتكەن ءباسپاسوز ءماسليحاتىندا.
بۇدان سوڭ جۋرناليستەر وسى ۋاقىتقا دەيىن دەنساۋلىق ساقتاۋ ۆيتسە-ءمينيسترى اجار عينياتتىڭ 1 اقپاننان 31 شىلدەگە دەيىنگى ارالىقتا 115 ۆاكتسينالانعان ادام كوز جۇمعانى تۋرالى اقپاراتىن ەسكە سالدى.
الەكسەي تسوي بۇل اقپاننان تامىز ايىن قوسا العانداعى ستاتيستيكا ەكەنىن جەتكىزدى.
- 482 ادامنىڭ ءبارى – تولىق ۆاكتسينالانعاندار. سىزدەر بىلەسىزدەر، بىزدە شىلدە-تامىز ايلارىندا اۋرۋشاڭدىق ءوسىپ، ءولىم-ءجىتىم كوپ بولدى. سوندىقتان وسىنداي ايىرماشىلىق بار. بىراق ءبارىبىر دە كوروناۆيرۋستان قايتىس بولعانداردىڭ دەنى ۆاكتسينا الماعاندار ەكەنىن كورىپ وتىرمىز. سوندىقتان مەن وسىعان نازار اۋدارۋدى سۇرايمىن، - دەدى تسوي.
سونداي-اق، ول قايتىس بولعان ازاماتتاردىڭ قانداي ۆاكتسينالارمەن ەگىلگەنىن ايتتى.
- CoronaVac - 23 ادام، سپۋتنيك V -371 ادام، قىتاي ۆاكتسيناسى Vero Cell جانە Hayat - Vax - 75 ادام، QazVac - 13, بۇل نەگىزىنەن قازاقستان نارىعىنا جەتكىزىلەتىن ۆاكتسينالار سانىنا سايكەس كەلەدى - دەپ تۇيىندەدى مينيستر.
ايتا كەتەيىك، بۇعان دەيىن دەنساۋلىق ساقتاۋ ءمينيسترى الەكسەي تسوي قازاقستاندا 6 ميلليوننان استام ادام ۆاكتسيناتسيالاۋدىڭ تولىق كۋرسىنان وتكەنىن حابارلاعان بولاتىن. ونىڭ ايتۋىنشا، ءتىپتى كەيبىر شەكتەۋلەردى الىپ تاستاۋعا مۇمكىندىك بەرەتىن يممۋندىق قابات قۇرىلعان ەكەن.
"ادىرنا" ۇلتتىق پورتالى
