ومىرقۇل اينيازوۆ: قازاقتار سوعىس بولسا دا توي جاسايدى

3646
Adyrna.kz Telegram

27 قىركۇيەكتەن باستاپ، ەلىمىزدە ۇيلەنۋ تويلارى مەن مەرەكەلىك ءىس-شارالاردى وتكىزۋگە رەسمي تۇردە رۇقسات بەرىلدى. بۇل جاڭالىقتى قاراپايىم حالىقتان بولەك، ونەر جۇلدىزدارى دا قۋانا قابىلدادى. قازاق ەستراداسىنىڭ كورنەكتى وكىلى ومىرقۇل اينيازوۆ الداعى تويلاردىڭ كارانتيندەگى تويلاردان قانداي ايىرماشىلىقتارى بولاتىنىن ايتىپ، پاندەميا كەزىندە دە جۇمىسسىز قالماعانىن جەتكىزدى، دەپ حابارلايدى "ادىرنا" ۇلتتىق پورتالى KAZ.NUR.KZ پورتالىنا سىلتەمە جاساپ.

- توي وتكىزۋگە رۇقسات بەرگەنىن، ارينە، قۋانىشپەن قابىلدادىق. الايدا، كارانتين كەزىندە دە تويعا، كىشىگىرىم وتىرىستارعا شىعىپ جۇردىك. مۇنى ءبارى دە بىلەتىن شىعار. وسى ورايدا ايتا كەتەيىن، انشىلەردى كارانتيندە تويعا باردى دەپ كىنالاۋدىڭ قاجەتى جوق. الدىمەن كارانتيندە توي جاساعاندار تۋرالى ويلاۋ كەرەك. ەگەر تويعا شاقىرتۋ كەلمەسە، ەشبىر ءانشى بارمايدى. ال شاقىرتۋدى توي يەلەرى جىبەرەدى. سوندىقتان، ماسەلەگە بارلىق جاعىنان قاراعان دۇرىس دەپ بىلەمىن.

- جالپى، ءوزىم كارانتيندە قاراپ قالعان جوقپىن. باسقا دا جۇمىسسىز ارىپتەستەرىم نە ىستەگەنىن بىلمەيمىن، جەكە ءوزىمنىڭ ايلىعىم ۇزىلگەن جوق. سەبەبى، ءبىراز جىلدان بەرى الماتى وبلىسىنداعى ءسۇيىنباي اتىنداعى فيلارمونيادا جۇمىس ىستەيمىن. كارانتيندە ايلىعىم توقتاعان دا جوق، ازايعان دا جوق، سول قالپىندا ءتۇسىپ وتىردى. ايتارلىقتاي قينالدىم دەپ ايتا المايمىن. ءتىپتى، بىلايعى كەزدە قولىم تيمەيتىندىكتەن، بوس ۋاقىتتى پايدالانىپ ءوز بيزنەسىمدى اشىپ الدىم. مال شارۋاشىلىعىنا بەت بۇرىپ، كوپتەن ويدا جۇرگەن ماقساتىمدى ورىندادىم، - دەيدى ءانشى.

سونداي-اق، ومىرقۇل اينيازوۆ كوپشىلىك سەكىلدى مەيرامحانانىڭ ارتقى ەسىگىنەن ەمەس، الدىڭعى جاعىنان كىرەتىنىنە قۋاناتىنىن ايتتى.

- بۇعان دەيىن رەستوراننىڭ ارتقى جاعىنان كىرىپ كەلدىك. قاپتالىنان دا، باسقا جەرىنەن دە كىردىك. ارتقى جاقتان كىرگەندە تويدىڭ بەر جاعىندا بولىپ جاتقان دۇنيەلەردىڭ ءبارىن كورەدى ەكەنسىڭ. كۋحنيا بار، باسقا دا شارۋاشىلىق بولمەلەرى بار. سولاردىڭ ءبارىن باسىپ ءوتۋ ماعان ىڭعايسىزداۋ ەدى. ەندى رەستوراننىڭ الدىنان كىرەتىنىمىزگە قۋانامىن. نەگىزى، قازاق ەشقاشان تويسىز وتىرا المايدى. قازاق قانداي زامان بولسا دا قىزىن ۇزاتىپ، ۇلىن ۇيلەندىرەدى. قازاقتار سوعىس بولسا دا توي جاسايدى. سوندىقتان، مۇنداي قيىن كۇندەر دە كورگەن تۇستەي ۇمتىلاتىنىنا سەنەمىن. كارانتيندە دومبىرامدى الىپ، ۇلكەندى-كىشىلى تويلاردا، بەتاشارلاردا، مەرەيتويلاردا بولدىم. مۇنى ەش جاسىرمايىن. تويعا بارعانىم راس. جالپى، كوپشىلىك حالىق قاراپ وتىرعان جوق، تويعا باردى، - دەيدى ونەر يەسى.

ەستەرىڭىزگە سالا كەتەيىك، 27 قىركۇيەكتەن باستاپ ەلدە كارانتيندىك شەكتەۋلەر جەڭىلدەتىلدى، سالتاناتتى جانە وتباسىلىق شارالارعا رۇقسات ەتىلدى. سونداي-اق كونفەرەنتسيالار، فورۋمدار جانە باسقا دا بۇقارالىق شارالاردى، كورمەلەردى وتكىزۋگە رۇقسات بەرىلدى. بۇعان قوسا، تازا اۋادا مارافون ۇيىمداستىرىپ، كورەرمەندەردىڭ قاتىسۋىمەن سپورتتىق شارالار وتكىزۋگە بولادى.

"ادىرنا" ۇلتتىق پورتالى

 

پىكىرلەر