ءالىم بەيسەمباەۆ – الەمدىك دەڭگەيدەگى فورتەپيانوشىلار بايقاۋىندا جەڭىسكە جەتكەن تۇڭعىش قازاقستاندىق.
ول — قاراعاندى قالاسىنىڭ تۋماسى. جۋىردا انگليانىڭ ليدس قالاسىندا وتكەن حح فورتەپيانوشىلار بايقاۋىندا ءالىم «ۋوتەرمان» التىن مەدالى مەن 25 000 فۋنت ستەرلينگ سىياقىعا يە بولدى.
قر مادەنيەت جانە سپورت مينيسترلىگىنىڭ ءباسپاسوز قىزمەتى مالىمدەگەندەي، ءالىم "Warner Classics" كومپانياسى ۇيىمداستىرعان داۋىس جازۋعا جانە "Steinway&Sons" تاراپىنان ەۋروتۋر جاساۋعا مۇمكىندىك العان. ول XX-XXI عاسىرلارداعى ۇزدىك تۋىندىلاردى جاقسى ورىنداعانى ءۇشىن بەرىلەتىن ليۆەرپۋلدەگى كورولدىك فيلارمونيا قاۋىمداستىعىنىڭ جانە medici.tv نۇسقاسى بويىنشا كورەرمەن كوزايىمى سىيلىعىنا يە بولعان.
بايقاۋ قورىتىندىسى بويىنشا جاپونيالىق كايتو كوباياشي ەكىنشى ورىن مەن كۇمىس مەدالعا يە بولسا، ۇزدىك ۇشتىكتى يزرايلدىك اريەل لاني تۇيىندەگەن. مۋزىكانتتار ليۆەرپۋلدەگى كورولدىك فيلارمونيانىڭ ديريجەرى ەندريۋ مانتسەنىڭ سۇيەمەلدەۋىمەن كلاسسيكالىق تۋىندىلاردى ورىنداعان.
ءالىم – بۇل بايقاۋدا جەڭىسكە جەتكەن تۇڭعىش قازاقستاندىق ونەرپاز. 23 جاستاعى مۋزىكانت 2016 جىلدىڭ قىركۇيەگىنەن باستاپ لوندونداعى كورولدىك مۋزىكا كوللەدجىنىڭ ماگيستراتۋراسىندا وقيدى. بۇل وقۋ ورنىندا ول تانىمال پروفەسسور – ۆانەسسا لاتارش پەن دميتري الەكسەەۆتەن ءدارىس الادى.
5 جاسىنان باستاپ فورتەپيانودا وينايتىن ول 2008 جىلى «ششەلكۋنچيك» اتتى تەلەۆيزيالىق بايقاۋدا جەڭىسكە جەتىپ، پ.چايكوۆسكي اتىنداعى ماسكەۋ مەملەكەتتىك كونسەرۆاتورياسى جانىنداعى ورتالىق مۋزىكا مەكتەبىنە وقۋعا تۇسكەن. اراعا 2 جىل سالىپ، انگلياداعى پەرسەلل مەكتەبىنە اۋىسقان. ول اتاقتى پەداگوگ تەسسا نيكولسوننان تەگىن ءبىلىم العان.
ءالىم — ۆەيمارداعى ليست اتىنداعى حالىقارالىق جاسوسپىرىمدەر بايقاۋىنىڭ جانە مانچەستەردەگى حالىقارالىق پيونيستەر بايقاۋىنىڭ جەڭىمپازى. سونداي-اق ۆان كليبەرن اتىنداعى جاس پيونيستەر اراسىنداعى ءى حالىقارالىق بايقاۋدا توپ جارعان. بۇل دودادا ءالىم 20 جىلدىق تاريحى بار بايقاۋدىڭ نەگىزىن قالاۋشى، الەمگە ايگىلى پيانيست ۋوتەرمان اتىنداعى ارنايى سىيلىقتى جەڭىپ الدى.
– بىزگە بايقاۋعا شامامەن 300-350 مينۋتتىق رەپەرتۋارمەن قاتىسۋ كەرەك بولدى. ورىندالاتىن شىعارمالاردىڭ كولەمى كوپ بولعاندىقتان، وتە قيىن بايقاۋلاردىڭ ءبىرى سانالادى. جەڭىسىمنەن كەيىن "ۋورنەر كلاسسيكس" مەنىڭ جەكە البومىمدى باسىپ شىعاردى.
جالپى ومىردە اتا-انامنىڭ ونەرگە قاتىسى جوق. مەن ۇيدەگى جالعىز مۋزىكانتپىن. ول كىسىلەردىڭ ايتۋىنشا، كىشكەنتاي كەزىمدە دۇكەنگە بارعانىمدا، شاعىن ويىنشىق پيانينو تاڭداپ الىپپىن. سودان بەرى فورتەپيانو مەنىڭ ومىرلىك سەرىگىمە اينالدى، — دەيدى ءالىم بەيسەمباەۆ.
ەۋروپادا ءوز تىڭدارمانى بار جاس ونەرپاز وسىلايشا بۇل بايقاۋدا دا كوپتىڭ ىستىق ىقىلاسىنا بولەندى. بولاشاقتا ءالىم تۋعان جەرىندە دە ونەر كورسەتۋدى ارماندايدى.
"ادىرنا" ۇلتتىق پورتالى.
